Монголын Урчуудын Эвлэлийн Увс аймаг дахь салбар холбоо байгуулагдсаны 80 жилийн ойг тохиолдуулан нутгийн уран бүтээлчдийн шилдэг бүтээлийн үзэсгэлэнг Улаангом хотод дэлгэжээ. Энэ сарын 12-14-нд “Ойрад” хөгжимт жүжгийн театрын бага танхимд гаргаж буй тус үзэсгэлэнгээр Увс нутгийн зураач, урчуудын уран бүтээлийг олон нийтэд толилуулсан байна.
Увс аймагт 1946 онд “Дүрслэх урлагийн салбар” нэртэйгээр Урчуудын эвлэлийн салбар холбоо байгуулагдаж, анхны эрхлэгчээр аймгийн Музейн анхны эрхлэгч Баянбадрахын Самбуу ажиллаж байжээ. Түүнээс хойш тус холбоог 1952-1953 онд Доржнамжил, Чөнөд, 1954-1956 онд Алтангэрэл, 1956-1966 онд Б.Цэвэгжав, 1967 оноос Монгол Улсын Урлагийн гавьяат зүтгэлтэн, зураач Э.Сүхээ нар удирдаж байв.
