Дотуур хувцасны алдарт “Victoria’s Secret” брэндийн 2026 оны загварын шоу аравдугаар сарын 18-нд АНУ-ын Лос-Анжелес хотод болж, дэлхийн алдартай загвар өмсөгчид болон хөгжмийн оддыг нэгэн дор цуглууллаа. Тус шоу хоёр жилийн дараа Нью-Йорк хотоос өөр газарт зохион байгуулагдсанаараа онцлог байв.
Энэ жилийн шоуг дөрвөн улирлын сэдэвт тулгуурлан бүтээжээ. Хавар, зун, намар, өвлийн өнгө төрхийг илэрхийлсэн загваруудаас гадна өвлийн хоёр дахь хэсэг болон залуу хэрэглэгчдэд чиглэсэн “PINK” брэндийн тусгай үзүүлбэр багтсан байна.
Загвар өмсөгчид цэцгийн дэлбээ, цасан ширхэг, гялалзсан металл чимэглэлээс санаа авсан хувцас, “Victoria’s Secret”-ийн алдарт сахиусан тэнгэрийн далавчтай загваруудаар тайзнаа алхжээ. Шоуны бүтээлч удирдагчаар Адам Селман ажилласан байна.
