Монголын шинэ үеийн утга зохиолыг үндэслэгч, их зохиолч Д.Нацагдоржийн амьдрал, уран бүтээлээс сэдэвлэсэн Төрийн соёрхолт, Соёлын гавьяат зүтгэлтэн Ш.Гүрбазарын зохиол, Урлагийн гавьяат зүтгэлтэн Ч.Түвшингийн найруулга “Жаргаагүй нар” түүхэн эмгэнэлт жүжгийг их зохиолч Д. Нацагдоржийн мэндэлсний 120 жил, Улсын драмын эрдмийн театрын түүхт 95 жилийн ойд зориулан арваннэгдүгээр сарын 5-наас тайзнаа дахин амилуулах гэж буй.
Эл жүжигт Монголын орчин үеийн уран зохиолын гол төлөөлөгч, жүжгийн зохиолч Донровын Намдагийн дүрийг УДЭТ-ын жүжигчин Т.Сэргэлэн бүтээнэ.
Жүжигчин Т.Сэргэлэн нь УДЭТ-ын тайзнаа 2016 оноос хойш Л.Толстойн “Адууны түүх” жүжгийн Азарга, Б.Шүүдэрцэцэгийн “Домогт Ану хатан” жүжгийн Цэвээнравдан, С.Жаргалсайханы “Тэмүүжин” жүжгийн Бэгтэр, К.Людвигийн “Оддын өвчин” жүжгийн Сондерс, Э.Оюуны “Би эндээс явахгүй” жүжгийн Дорлиг, О.Элбэгтөгсийн “Надтай үлдээч” жүжгийн Зоригт, Ц.Балдоржийн “Хайрын виз” жүжгийн Жаргал, Л.Н.Толстойн “Анна Каренина” жүжгийн Алексей Вронский, Б.Цогнэмэхийн “Хаадын хаан. Андгай” жүжгийн Алтан, У.Шекспирийн “Ромео Жульетта” жүжгийн Тибальт, Б.Цогнэмэхийн “Тэнгэрийн хүү” жүжгийн Арваадай, Южин О’Ниллийн “Хайлаас модны доор чамайг хүлээнэ” Эбин Кэбот, Б.Лхагвасүрэнгийн “Үгүйлэгдсэн хайр” жүжгийн Базар, ”Orfey” театрын бүтээл, Жон Патрикийн “Опал” жүжгийн Брэдфорд Винтер, С.Жаргалсайханы “Шөнө дундын бүжиг” жүжгийн Хавх зэрэг гол дүрүүдээр тайзнаа амьдарчээ.
