“Auro” фильмийн Б.Чингүүн найруулагчийн шинэ уран бүтээл тун удахгүй үзэгчдийн хүртээл болох гэж байгаа билээ. Гэгээн хайрын түүхийг өгүүлэх тус бүтээл нь дөрөвдүгээр сарын 24-нд нээлтээ хийхээр зэхээд байгаа юм байна. Түүний шинэ бүтээлийн гол дүрд Монголын кино урлагийн төлөөлөл болсон залуу уран бүтээлчид тоглож байгаа гэдгээрээ хэвлэл мэдээллийн салбарт чамгүй шуугиан дэгдээгээд байгаа билээ.
Харин залуу уран бүтээлч Б.Чингүүн найруулагч өөрийнхөө бүтээлийнхээ талаар бидэнтэй хуваалцсаныг хамтдаа сонирхоё.
-“Учрал” уран сайхны киноны бусад кинонуудаас ялгарах зүйл нь юу вэ?
-“Учрал” уран сайхны кино бол өнөөдөр байгаа цэвэр амьд харилцааны тухай өгүүлнэ. Бид өнөөдөр сошиал медиа болон интернэт ертөнцөөр аялаж зурганд хууртаж байгаа нэг хэсэг байхад. Гэр бүлийн тэр сайхан нанидан харилцаагаа алдаж, мөнгө, эд зүйлсд толгойгоо мэдүүлж байгаа нэг хэсэг бий. Тэр ч утгаараа хайрын үнэ цэнэ, гэр бүлийн гэгээн дурсамж сэвтэж байгаа юм. Гэхдээ энэ зүйл мартагдаагүй яг л хэвээрээ та бидний амьдрал гэгээн хэвээрээ байна. Энэ бол амьдралтай танилцах учрал, хайрын учрал, анд найзуудын учрал бүрийг харуулах болно.
-Дөрөвдүгээр сард нилээд олон кино бүтээлүүд нээлтээ хийхээр зэхжээ. Таны бүтээл эдгээр бүтээлүүдээс юугаараа онцлогтой байх вэ?
-Энэ хаврын хамгийн романтик кино байх болно. /Инээв/.
-Таны кино ямар кино театруудаар нээлтээ хийх вэ?
-“Хүннү”, “Өргөө”, “Тэнгис”, “Соёмбо” кино театрууд болон хөдөө орон нутгийн кино театруудаар үзэгчдийн хүртээл болох болно. Мөн дахин хэлэхэд энэ бол цэвэр залуусын тухай кино.
С.ЦЭЦЭГ
