Улсын драмын эрдмийн театрын хамт олон сонгодог жүжгийн өдрүүдийн хүрээнд Г.Ибсений алдарт “Нора” жүжгийг тайзнаа амилуулах гэж байна. Тоглолт өнөөдөр буюу 4 дүгээр сарын 9-ны 17:00 цагт, маргааш 19:00 цагуудаас УДЭТ-ын тайзнаа тоглогдох нь ээ. Уг жүжгийг тэртээ 30 жилийн өмнө “Говийн зэрэглээ” киноны Арслангийн дүрээр үзэгчдийн сэтгэлд мөнхөрсөн найруулагч, жүжигчин Г.Доржсамбуу агсан тайзнаа тавьж байжээ. Дүрүүдэд Нора- Г.Отгонцэцэг СТА, Хельмер- Г.Дөлгөөн-Аюуш нар бүтээжээ.
Жүжгийн үйл явдал өмгөөлөгчийн ажлаас банкны захирлын албан тушаалд дэвшиж байгаа Хельмерийн гэрт зул сарын баярын өмнө өрнөнө.
Норагийн нөхөр Хельмер хүнд өвчин тусч, гадаадад очиж эмчлүүлэх шаардлагатай болсон үед тэрбээр нөхрийнхөө бардам занг хүндэтгэн түүнд хэлэлгүй, үхлүүт өвчтэй байсаар нас барсан эцгийнхээ гарын үсгийг дуурайлган хуурамчаар зурж, гэрээ хийснээр итгэмжлэгдсэн төлөөлөгч Крогстагаас эмчилгээний зардал болох их хэмжээний мөнгийг нууцаар зээлсэн аж.
Сэргэлэн цовоо зантай Нора цаг тутамд л нөхрөөсөө мөнгө салгахыг хичээнэ. Учир нь тэрбээр өрөө төлөхийн тулд нөхөр, хүүхдийнхээ хэрэглээнээс бусад бүх зүйлд дээр хэмнэлт хийж, өөрийн өмсөх зүүх хэрэглээгээс хасаж, нууцаар ажил хийн Кростагаас зээлсэн мөнгөө бага багаар төлнө.
Гэвч нэгэн өдөр Норагийн багын найз Кристина тэднийд урилгагүй гэнэт зочлон ирснээр төлөвлөгөөт амьдрал нь нурж, хэн бүхнээс нууж байсан нууц нь задрах эхлэл тавигдана. Кристина амьдралын хүнд хэцүүг туулсан тухайгаа Норад ярин туслахыг гуйхад өрөвч, нинжин сэтгэлтэй Нора нөхрөөсөө түүнийг ажилд авахыг гуйн ятгасаар зөвшөөрүүлж чаддаг. Энэ гуйлтыг зөвшөөрсөн Хельмер хэдийнээс л дургүй байсан багын найзаа буюу Норагийн зээлдэгч Крогастадыг боломж гарсан дээр ажлаас нь халж, Кристинаг оронд нь томилох шийдвэр гаргажээ. Үүнийг мэдсэн Кростаг Норад нөхрийнхөө гаргасан шийдвэрийг өөрчлөхгүй бол бүх үнэнийг дэлгэсан захиаг нөхөрт нь илгээхээс гадна хуурамчаар гэрээ хийснийг нь төлөө шүүхэд мэдэгдэнэ хэмээн сүрдүүлнэ.
Билетийг УДЭТ-ын кассаар
Үнэгүй хүргэлт 1900-1617
Дэлгэрэнгүй мэдээллийг Касс: 70118187,
Маркетинг: 70128999 , 99026929, 95469964, 99997365
www.urlag.mn
