Дэлхийн хамгийн алдартай шоуны нэг Got talent шоу Азид зохион байгуулагдаж байгаа бөгөөд Asia s got talent шоу нь энэ оны гуравдугаар сарын 12-ноос AXN телевизээр Азийн 20 гаруй улс оронд зэрэг цацагдаж эхэлсэн билээ.
Тус шоунд Азийн улс орнуудаас мянга мянга оролцогчид ирж оролцсоноос "Хөсөгтөн" хамтлаг сая сая үзэгчид болоод эрхэм шүүгчдэд Монгол ардын урлагийн гайхамшгийг мэдрүүлж тэднийг бишрүүлээд авсан бөгөөд шүүгчдээс санал нэгтэйгээр "Тийм" гэсэн үнэлгээг авч хагас шигшээд шалгаран үлдсэн билээ.
Улмаар “Хөсөгтөн” хамтлаг хоёрдугаар шатыг давж, шилдэг ест шалгарч үлдээд байсан. Тэгвэл финалын шатны санал асуулга өчигдөр орой дуусч, ердөө хоёр хоногийн дараа энэхүү тэмцээнд түрүүлэх багийн нэр тодорхой болох гэж байна. Тодруулбал, шилдэг есөн хамтлагийн гала тоглолт дээр ялагчийн нэрийг зарлах юм. Ямар ч байсан “Хөсөгтөн” шилдэг есөн оролцогчийн нэг болж, эх орныхоо нэрийг тив, дэлхийн хэмжээнд гаргаж чадлаа.
Санал асуулга дууссан дараа тэд “Авьяаслаг Азичууд-2015” уралдааны шилдэг есөн хамтлагийн финалын санал асуулга дууслаа. Бидний төлөө санал өгсөн, санал худалдан авсан, мессеж бичсэн бүх монголчууддаа болон Монголын ардын урлагт шимтэн дурлаж, “Хөсөгтөн” хамтлагийг дэмжсэн Ази тивийн болон бусад тивээс дэмжсэн бүх хүмүүст баярлалаа.
Мөн дэлхийн өнцөг булан бүрээс бидэнд саналаа өгсөн элэг нэгт монголчууддаа бүгдэд нь баярлаж буйгаа илэрхийлье. Одоо энэ сарын 14-нд Галаа тоглолт дээр уралдааны ялагчийг зарлана. Тийм болохоор хүлээх л үлдлээ. Ёстой тэнгэр мэдтүгэй. Дахин баярлалаа та нартаа” хэмээжээ. Ингээд санал асуулгын дүнг хүлээх л үлдлээ дээ.
