Хааяадаа бүсгүйчүүд бид нүсэр зочид хүлээн аваад гал тогоогоо ч цэвэрлэж, аяга тавгаа угаах чадалгүй ор руугаа зүтгэх үе цөөн боловч гардаг нь үнэн. Тэр яахав өглөө нь хэрвээ эртхэн босчихвол гялалзуулчих л ажил. Харин нүүрээ цэвэрлэлгүй унтахыг ор тас мартаарай. Өдөржин хуримтлагдсан бактери арьсанд суурьшин, коллагенийг устган, арьсыг гундаадаг. Цагаа хэмнэх гэж нойтон салфетки хэрэглэж болохгүй шүү.
Хөдөө гадаа явах үед хаа нэгтээ байж болох. Харин амарчилж хэрэглээд байвал арьс хуурайшиж хөгширдаг байна. Харин сайхан арьстай байхыг хүсвэл нүүр угаагчийг 7 хоногтоо 2 удаа хэрэглэхийг гоо сайханчид зөвлөдөг. Өнгөө алдах, улайх, батга гарах сөрөг нөлөө багасдаг сайн талтай. Зарим хүүхнүүд нэлээн зузаан буддаг, арилгах гэж багагүй зүдэрдэг. Тийм бол тосон цэвэрлэгч таны найдвартай туслагч байх болно. “Арган”, “Гүнжид” гээд тосны агууламжтай цэвэрлэгч нь бохирдлыг хурдан арилгахаас гадна арьс таталдуулдаггүйгээрээ онцлог. Эхлээд жаахан иллэг хийгээд багахан усаар чийглэж сүү шиг болтол нь үрээд усаар зайлна.
Тэгээд зөөлөн дарж арчихад сайхан зөөлөрнө дөө. Арьсаа тогтмол гуужуулахыг битгий эрхэмлээрэй. Хатуурч, хуурайших эрсдэлтэй. 7 хоногтоо 1-2 удаа л хангалттай үйлчилгээ болно. Маргаашийнхаа төлөө хийх энэ 30 секунд та бидний гоо сайхан байхын эхлэл юм шүү. Аливаа амжилт энгийнээс эхэлдэг, энгийн бүхэн нийлсээр үр дүн дагуулдаг.
Эх сурвалж:www.mongoljingoo.mn
