“Манай гэр бүл” халамжийн төвийн хамт олон болон бяцхан хүүхдүүдийн урласан гар урлалын бүтээлийн үзэсгэлэн худалдаанд Та бүхнийг хүрэлцэн ирэхийг урьж байна. Үзэсгэлэн худалдааны үеэр халамжийн төвийн 3-15 насны авъяаслаг жаалууд МУСТА Д. Хосбаяр, МУСТА Д. Ганцэцэг, МУСТА Д.Түвшинтөр нарын хамт урлагийн тоглолтоороо та бүхний мэлмий, сонорыг мялаах болно. Мөн The Square Grill & Pub-ын хамт олон таныг амтат зууш, ундаагаар дайлна. Бидний зохион байгуулж байгаа халуун сэтгэлийн хандивын үйл ажиллагаанд хүрэлцэн ирнэ үү! Үзэсгэлэн худалдаа 11-р сарын 21-ний Бямба гаригийн 14:00 цагт Централ Тауэр цамхагийн 3 давхарт байрлах The Square Grill & Pub-д болно.
ТУСАЛЧИХ ЮМСАН ГЭСЭН СЭТГЭЛТЭЙ АМЬДАР
Өөрөө л болж байвал боллоо бусад хүмүүс яах нь над ямар хамаатай юм бэ гэж амиа л боддог хэнийг ч бай хүн гэж өргөмжлөхөд үнэхээр хэцүү. Бид адгууснаас юугаараа ялгаатай юм бэ? Зүрх сэтгэлээрээ, оюун ухаанаараа. Бид нэг нэгнээ хайрлаж, нэг нэгэндээ туслахгүй юм бол өөр хэн тэднийг хайрлах юм. Таныг ч бас хэн хайрлах юм. Та туслах боломжгүй байж болно. Гэхдээ тусалж чадах хэн нэгнийг мэдэж байж ч болно шүү дээ. Туслах хүнийг мэдэхгүй, тусалж чадахааргүй байсан ч туслах гэж оролдож байгаа чинь сэтгэлийн том тус юм шүү. Өвдөж үзсэн хүн л өвдөхийн зовлонг илүү ойлгоно. Ядарч үзсэн хүн л ядарч зовохын хэцүүг илүү мэднэ. Би л ингэж зовоогүй бол боллоо гэж үл тоомсорлосон байдалтай л битгий байгаарай. Болж л өгвөл тусалчих юмсан гэсэн сэтгэлийг байнга тээж яваарай. Монгол хүнийг монгол хүн л хайрлахгүй бол өөр хэн хайрлах билээ.
