Бидний бодит байдал мөрөөдлөөс минь дэндүү хол байх нь бий. Мөрөөдөл дотроо бол чи компанийнхаа төлөөлөн удирдах зөвлөлийн тэргүүн болчихсон энэ оны эхний хурлыг амжилттай удирдаж сууна.
Харин бодит байдал дээр чи ахлахынхаа тушаалаар амралтын өдрөөр ч компьютерээ ширтэн суугаа жирийн л нэг, цалинтай ажилтан. Эсвэл мөрөөдөлдөө чи нэртэй загварын нийтлэлч нарын өмнө Haute couture загвараа танилцуулаад, төгсгөлд нь өөрөө гарч алга ташилтын өмнө мэхийн ёсолж байна. Харин бодит байдал дээр чи хоолны мөнгөө залгуулахын тулд одоогоор захиалгын даашинз оёж суугаа шинэхэн дизайнер.
Чиний одооны байр байдлыг хараад мөрөөдлийг чинь сонсвол зарим хүний хөх инээд хүрэх л байх. "Чи юу даа? Жоохон том болооч” гэж хэлэх ч хүн гарч магадгүй. "Худлаа том том, үлгэрийн юм ярих юм. Байж байгаагаа нэг хар л даа”. Хааяа чи хүртэл өөртөө ингэж хэлээд санаа алдан бодит байдалтайгаа эвлэрдэг. Чадахгүй зүйлээ амлаж, өөртөө худлаа яриад байгаа юм шиг санагддаг болохоор л тэр.
Гэхдээ юу гээч? Бодит байдалдаа нийцүүлж мөрөөдлөө буулгах биш, өөртөө итгэх итгэлээ дээшлүүлж мөрөөдөлтэйгөө зэрэгцэж очих хэрэгтэй. Хамгийн ихээр хүсдэг зүйлээ өөрийн болгосон байгаагаар бүрэн төсөөлж ч чадахгүй, тийм сул дорой бүү байгаарай. "Би хийж чадахгүй байх өө” гээд саад бэрхшээл, сорилт, өөрийгөө голох мөч бүрийн тоогоор мөрөөдлөө дахин дахин жижигсгэж болохгүй. Бодохоос аймаар санагдаж, цээжин дээр нэг юм тулгадаг тэр том мөрөөдөл чинь буух ёсгүй хэмжүүр юм.
Бодит байдал ердөө ч асуудал биш. Нөхцөл байдал биш бодол санаа хүнийг тодорхойлдог. Харин нөхцөл байдалдаа дийлдсэн бодол санаатай байвал мөрөөдөл чинь үнэхээр л үлгэрийн зүйл болж хувирна. Одоо байгаагаасаа 100 дахин томыг зоригтойгоор мөрөөд. Бид толгойдоо бүрэн зураглаж чадсан зүйл рүүгээ л чиглэж амьдарч чадна. Мөрөөдлөө хүмүүст ярихдаа хүртэл шоолох вий гэж ичсэндээ "Биелэхгүй ч байж магадгүй л дээ” гэсэн үгээр заавал өмнөтгөл хийдэг итгэл муутай эмэгтэй чи биш биз дээ?
Мөрөөдлийнхөө жагсаалтыг эргэн нэг хараад, "биелэх боломжтой” гэж өөрийн тодорхойлсон жижиг мөрөөдлүүдээ хасч, оронд нь бодохоос л аймар санагдаж байгаа, сэтгэлийн гүнд нуугддаг томхон мөрөөдлөө зоригтойгоор дүрсэлж бичээрэй. Чиний үзэл бодол л мөрөөдөлтэй чинь зэрэгцэж чадаж байвал, мөрөөдөл чинь чиний хувь тавиланд багтаж л таараа!
Ирэх долоо хоногт хамаагүй том мөрөөдөөрэй.Мөрөөдөл биелэх шинэ оны эхний амралтын өдрийн мэнд! Саяхан орсон цастай, цав цагаан тал шиг нэг ч ул мөр үлдэж амжаагүй байгаа 2015 онд чи юуг биелүүлэхээр зорьж байна вэ? Магадгүй чи энэ жилийн хүслийн жагсаалтаа аль хэдийнэ гаргачихсан байх.
Эх сурвалж: goolingoo.mn
