Жирэмсэн үеийн гар утасны хэт хэрэглээ хүүхдийн зан авирт нөлөөлж, мөн нялх хүүхдэд тархины хавдар үүсэхэд хүргэдэг.
Жирэмсэн үед гар утасны хэт их хэрэглээ урагт муугаар нөлөөлдөг байна. Иймээс эцэг, эхчүүд энэ асуудалд чухал ач холбогдол өгөх цаг нь болжээ. Гар утас гэдэг бол яалт ч үгүй бидний амьдралын нэгэн хэсэг болчихсон технологийн ололт билээ.
Гэсэн ч хүн бүр дор бүрнээ эрүүл мэндээ юун түрүүнд тавих ёстой гэдгийг маш сайн ухамсарлах хэрэгтэй. Гар утас тархины хавдар үүсгэдэг болохыг Хүрээлэн буй орчны эрүүл мэндийн салбарын ерөнхийлөгч Доктор Дэврас Давис анхааруулжээ. Мөн бага насны хүүхдүүд гар утаснаас ялгарч буй цацраг туяаг насанд хүрэгчдээс 2 дахин их хэмжээгээр тархиндаа шингээж байдаг гэсэн юм. Эрүүл мэнд, Шинжлэх Ухааны салбарынхан 2016 оны 5-р сарын 3-ны өдөр болж өнгөрсөн Балтиморын Конвенци дахь “Хүүхдийн тухай бага хурал”-ын үеэр гар утасны хүүхэд,багачуудад үзүүлэх олон хор уршгийн талаар хэлэлцэв. Энэ хурлын үеэр Анагаах ухааны Йелийн сургуулийн Доктор Хьф Тейлор гар утас нь хүүхдийн зан авирт нөлөөлдөг гэдгийг мэдэгдсэн байна. Мөн энэ технологийн дэвшилт нь эцэг эхчүүдэд ч бас хэт их ачаалал өгч байдаг ажээ. Учир нь тэд өдөрт дунджаар 60-110 удаа утсандаа ямар нэг мэдэгдэл ирсэн үгүйг шалгадаг гэнэ. Эмч нар нялхсын тархи хэвлийдээ бүрэлдэж байхдаа хамгийн эмзэг байдаг учраас жирэмсэн үедээ гар утасны хэрэглээгээ хянах, тэр тусмаа жирэсний сүүл үеүдэд бүр хатуу хориглох хэрэгтэй гэж зөвлөжээ. Судлаачид жирэмсэн эхийг гар утаснаас зайгаа баривал учирч болох эрсдлийг бууруулж болно гэж үзэж байна. Утсаар ярих шаардлагатай тохиолдолд чихэвч ашиглаж бусад үед өөрөөсөө хол тавьж байхыг сануулсан юм. Гар утас ингэж өндөр хэмжээнд хөгжин бидний өдөр тутмын хэрэглээг хангаж байхад огт хэрэглэхгүй байна гэдэг бас хэцүү. Тиймээс Хүрээлэн буй орчны эрүүл мэндийн салбарынхан гар утас үйлдвэрлэгч болон утасгүй сүлжээний компаниуд энэ аюулаас хэрхэн сэргийлж болох талаар хамтран ажиллаж байгаа гэнэ.
www.unuudur.mn
