2004 оноос эхлэн хамтарсан уран бүтээлээ тууривж эх орон, нутаг ус, элбэрэл хайр, гэр бүлийн нандин бүхнийг багтаасан ЕРӨӨЛТЭЙ АЯЛГУУ шинэхэн цомог энэ онд хэвлэлтээс гарч, сонсогч түмний хүртээл болсон. Тус цомог нь нийт 18 дуутайгаас 8 дууг нь уран бүтээлчид маань хамтран дуулсан байна.
Зүрхнийхээ хөг хэмнэлийг анирлан чагнаж, ухаарал уянгыг аялгуу дуугаараа дамжуулан бидний оюун санаанд гэгээн бодол хөврүүлэгч уран бүтээлчид болох Төрийн хошой шагналт, Ардын жүжигчин Л.Мөрдоржийн нэрэмжит Хилийн цэргийн дуу бүжгийн чуулгын Гоцлол дуучин МУГЖ Бямбасүрэнгийн Ганчимэг, Төрийн шагналт, ардын жүжигчин Ц.Намсрайжавын нэрэмжит Улсын Филармонийн Гоцлол дуучин МУСТА Сүхбатын Баттулга нарын ЕРӨӨЛТЭЙ АЯЛГУУ цомгийн баяр, хамтарсан тоглолт 2016.09.30-ны 19:00 цаг дор Тусгаар тогтнолын ордны концертын танхимд болох гэж байна.
Тоглолтонд Төрийн шагналт, Ардын жүжигчин Ц.Намсрайжавын нэрэмжит Улсын Филармонийн Морин хуурын чуулга, удирдаач МУСТА Д.Түвшинсайхан, сонгодог дөрвөл хөгжимчид, Төрийн хошой шагналт Ардын жүжигчин Л.Мөрдоржийн нэрэмжит Хилийн цэргийн дуу бүжгийн чуулгын Найрал хөгжим, удирдаач УГЗ хөгжмийн зохиолч, Хурандаа Б.Ганхуяг, МУСТА Н.Даваасүрэн, Найрал дуучид, бүжигчид, зочин уран бүтээлчээр Хөдөлмөрийн баатар, Ардын жүжигчин Б.Зангад, Хөгжим судлаач МУСГЗ Ч.Буянхишиг, МҮОНР-ийн дэргэдэх хүүхдийн найрал дууны “Улаан бүч” чуулга, зэрэг мэргэжлийн хоёр урлагийн байгууллагын 150 гаруй уран бүтээлчид оролцсон бүрэн хэмжээний томоохон тоглолт болохоор төлөвлөгдөж байгаагаараа онцлогтой.
МУГЖ Б.Ганчимэг, МУСТА С.Баттулга нар нь хувь уран бүтээлчийнхээ хувьд тус бүрдээ бие даасан болон цуврал 10 гаруй тоглолт, бие даасан гурав, гурван цомог гаргасан бөгөөд ЕРӨӨЛТЭЙ АЯЛГУУ цомог нь арав гаруй жилийн хамтын уран бүтээлийн анхны цомог юм.
ЕРӨӨЛТЭЙ АЯЛГУУ тоглолтыг зохион байгуулагчаар ЭРХЭМ урлагийн товчоо ажиллаж байна. Мөн уран бүтээлчид маань “Үдшийн хэмнэл” студитэй хамтран“Ерөөлтэй аялгуу” бүрэн хэмжээний тв нэвтрүүлгийг үзэгч сонсогчиддоо бэлтгэн толилуулж байна.
Тоглолтын дэлгэрэнгүй мэдээллийг 99997586, 99990253 утаснаас болон
https://www.facebook.com/Battulga-Sukhbat https://www.facebook.com/ganchimeg.byambasuren фэйсбүүк хуудаснаас аваарай.
Дуунд хайртай, дуугаар жигүүрлэгч та бүхнийг нэгэн үдэш уран бүтээлчдийн олон сайхан дууг оюун санаа, зүрх сэтгэлээрээ мэдэрч сэтгэлийн цэнгэл эдлэхийг урин залж байна.
