АНУ-ын тэргүүн хатагтайн үүргийг нэгэн цагт хүлээж байсан тэрбээр төрийн тэргүүн болохоор санаа шулуудан эрчүүдтэй нэгэн адил тэмцэж яваа хүчирхэг эмэгтэй.
Тэрбээр 1947 оны 10-р сарын 26-д төрсөн бөгөөд өчигдөр түүний 69 насны ой тохиосон билээ. Ирэх сарын найманд АНУ-ын ерөнхийлөгчийн сонгууль болох бөгөөд үүнтэй холбогдуулан Хиллари инстаграм хуудсандаа өөрийн хүүхэд насны зургийг оруулж “ирээдүйн энэ ерөнхийлөгчид төрсөн өдрийн мэнд хүргэе” гэжээ. Хиллари Дайан Родэм хүүхэд байхын нийгмийн идэвхитэй, олон нийтийн ажилд сонирхолтой нэгэн байсан юм.
…1971 оны хавар би нэгэн охинтой танилцсан юм. Улс төр, иргэний эрхийн хичээл дээр бид хамт сууж байсан бөгөөд өтгөн шаргал үстэй, нүдний шил зүүж нүүрэээ будаагүй тэр охин өөртөө тун итгэлтэй зоримог санагдсан. Би түүнд яг л соронз мэт татагдсан. Би түүнд дөхөж очоод урлагийн музей үзэх санал тавьснаар бидний хайр дурлалын түүх эхэлсэн хэмээн түүний нөхөр АНУ-ын ерөнхийлөгч асан Билл Клинтон дурссан байдаг. Хиллари нөхрийнхөө гэрлэх саналаас татгалзсан тул түүндээ хоёр дахь удаа гэрлэх санал тавьсан гэж Билл ярьсан юм.
Хосууд 1971 оны 10-р сарын 11-д гэрлэсэн бөгөөд би хамгийн сайн найзтайгаа хуримаа хийсэн гэж Билл гэрлэлтээ дүгнэсэн байдаг. Тэд Челси Клинтон хэмээх ганц охинтой. …1980 оны хоёрдугаар сарын 27-д би Үндэсний засгийн газрын чуулганаас гэртээ ирээд дөнгөж 15 минут л болж байлаа. Гэнэт Хилларигийн ус нь хагарч бид эмнэлэгт яаралтай очиж охин минь шөнө дунд хорвоод мэндэлж байлаа. Энэ бол миний амьдралын хамгийн гайхалтай мөч, бүх шинэ зүйлийн эхлэл болсон доо хэмээн Билл Клинтоны дурсамжинд бий.
Хиллари Клинтон АНУ-н тэргүүн хатагтай, Төрийн нарийн бичгийн дарга болон удирдах шатны хариуцлагатай албан тушаал эрхэлж байснаас гадна эр нөхрийнхөө алдааг уучилж гэр бүлээ элэг бүтэн авч үлдэж чадсан маш ухаалаг эмэгтэй. Билл Клинтоны янаг амрагийн хэрээс хэтэрсэн явдлууд өдгөө ч түүний сонгуулийн компанит ажилд сөргөөр нөлөөлдөг. Гэсэн хэдий ч энэ бүхнийг ардаа орхиж, урагшаа тэмүүлсэн Хиллари Клинтон АНУ-ын 46 дахь ерөнхийлөгч болохоор итгэл төгс алхаж байна.
И.МӨНХЦЭНГЭЛ
Эх сурвалж: www.zone.mn
