Увс аймгийн Давст сумын харьяат “Алдар” спортын хороо, “Олимп” дээд сургууль, ДЦС-4 ТӨХК-ийн бөх аймгийн арслан П.Бүрэнтөгс Их Монгол Улс байгуулагдсаны 806, Ардын хувьсгалын 91 жилийн ойн үндэсний их баяр наадамд ес давж Улсын арслан цол хүртсэн билээ.
Аймгийн арслан П.Бүрэнтөгс 91 жилийн ойд түрүүлснээр Ардын хувьсгалын түүхэн он жилүүдэд улсын цолгүй бөх түрүүлсэн дөрөв дэх тохиолдлын эзэн болж, Ардын хувьсгалаас хойшхи 50 дахь арслан цолтон болон тодорчээ.
1955 онд 256 бөх сугалаагаар барилдаж, Төв аймгийн Баянбараат сумын уугуул, залуу бөх С.Оргодол найм даван түрүүлж, шууд улсын арслан цол хүртэж байснаас хойш ийнхүү 57 жилийн дараа улсын цолгүй хүчтэн төрийн наадмын түрүү хүртэж буй нь энэ юм. Идэр залуу шинэ арслан мөн цагийг эзэлсэн их аварга Б.Бат-Эрдэнийн 25-ны жил дээрээ анх удаа улсын наадмын түрүү хүртэж байсан амжилтыг давтсан байна.
Ямартаа ч ард түмний ам дамжин яригдах шуугиант наадам шувтарч, бөхийн ертөнцөд Пүрэвийн Бүрэнтөгс гэж шинэ арслан төрлөө.
Долдугаар сарын 12-ны орой гэртээ ардын наадмын түрүүг авч очих хувь тохиолоо бяр, сэтгэл хоёртоо нөөж байсан энэ залуугийн хэн болох талаар хэвлэлүүдэд шуугиж байна.
Улсын арслан П.Бүрэнтөгс 1988 оны шороон луу жилд Увс аймгийн Давст сумын харьяат аврага малчин Пүрэвийн гэр бүлд төржээ.
Улсын арслан П.Бүрэнтөгс 2006 онд Увс аймгийн Давст суманд дунд сургуулиа төгсөж, “Олимп” дээд сургуулийн чөлөөт бөхийн ангид элсэн оржээ. Түүний үндэсний бөхийн эрдэм ухаан заасан анхны багш нь Даян аварга Агваансамдангийн Сүхбат гэдэг юм билээ.
Саяханыг хүртэл А.Сүхбат аваргын “Олимп” дэвжээнд харьяалагдаж байсан улсын арслан П.Бүрэнтөгс, Их Монгол Улс байгуулагдсаны 806, Ардын хувьсгалын 91 жилийн ойн үндэсний их баяр наадмын бэлтгэл сургуулилтаа “Увс нуур” дэвжээнд нутгийн бөхчүүдтэйгээ хамт хийж, “Алдар” спорт хороонд харьялагдаж эхэлжээ.
Тэрээр өдгөө эхнэр, охины хамт амьдардаг бөгөөд ДЦС-4 ТӨХК-ийн Цахилгаан цехийн ажилчин хийдэг аж. Түүний эхнэрийг Хэнтий аймгийн уугуул, охин нь ой гарантай хэмээн ойрын эх сурвалж мэдээллээ.
Хамгийн сүүлийн мэдээллээр “шинэхэн” арслан П.Бүрэнтөгст Увс нутгийн зөвлөл Lexus 570 бэлэглэж, ДЦС-4 ТӨХК-ийн хамт олон нь “Станцын хүндэт ажилчин” цолоор шагнаж, хоёр өрөө байр бэлэглэсэн сурагтай байна.
Б.Дэжид
