СЕХ өчигдөр хуралдаж нэр дэвшигчдийг өргөн мэдүүлэх талаар хэлэлцээд маргаантай байгаа Өвөрхангай, Увс, Орхоны дүнг асуудал эцэслэн шийдэгдтэл танилцуулалгүй авч үлдэхээр санал хураасан юм. Санал хураалтанд СЕХ-ны есөн гишүүнээс тав нь буюу Ч.Содномцэрэн, Б.Билэгт, Б.Алтанжаргал, Д.Эрдэнэчулуун, Н.Дагва нар дээрх гурван тойргийг танилцуулалгүй авч үлдэх нь зүйтэй гэсэн санал өгчээ. Харин үлдсэн дөрөв нь татгалзсан ч олонхийн саналаар авч үлдэхээр болсон байна. Гэтэл СЕХ-ны шийдвэрийг зөрчиж, удирдлагуудаар нь Увс, Орхоны дүн мэдээг танилцуулж, Өвөрхангайг авч үлдэх ажлыг хийн ерөнхийлөгчид УИХ-д сонгогдсон 72 нэр дэвшигчийг танилцууллаа.
Энэ талаар СЕХ дахиж хуралдаагүй бөгөөд энэ нь хууль бус шийдвэр юм. Увс аймгаас нэр дэвшсэн Ч.Хүрэлбаатар, Б.Чойжилсүрэн нар нь мөнгө тарааж, иргэдийн саналыг худалдан авсан нь бичлэг, болон иргэдийн гомдолоор нотлогдож байгаа ч эрх мэдлийн төлөө ийнхүү хууль зөрчин тохиролцоо хийжээ. Харин энэ хууль бус үйлдлийг таслан зогсоох цорын ганц найдвар нь Ерөнхийлөгч болоод байна. Тиймээс шүүхийн шийдвэр гартал Увс аймгаас УИХ-д сонгогдсон гэх Ч.Хүрэлбаатар, Б.Чойжилсүрэн нарыг түдгэлзүүлэх эсэх нь Ерөнхийлөгч хэрхэхээс шалтгаалах болоод байна.
