“Royal academy”-ийн тэргүүн Н.Учрал гашуун ундаанаас хол байж, ажил амьдралаа өөд нь татахыг үеийн залуустаа ойлгуулах гэж ихэд хичээдэг нэгэн. Ам нээх бүртээ л амьдралын сургаал хайрлаж “Архи битгий амс” гэж айлдаж буй түүнийг хараад зарим найз нөхөд нь ихэд гайхдаг юм байх. Ямартаа л шинэ оны босгон дээр тохиосон төрсөн өдрийнхөө баярын ширээг сүүгээр дүүргэх дөхөж, найзуудаа дайлсан мань эрд дургүйцсэн хүн олон таарч. Ерөнхийлөгчийнхөө уриалгыг дэмжин баярын үгээ хундагатай сүүгээр мялаасан захирал залуу өөрийнхөө биеэр үлгэр дуурайлал үзүүлэн, архи тамхины эсрэг байгаагаа илтгэсэн аж.
Харин үүнийг нь ойлгоогүй зарим хүн “Сүүтэй од” хэмээн цоллож, сүү захиалсан найзуудаа цаашлуулан тохуурхдаг болсон гэнэ. Ялангуяа рок попын одод цагаан хоолтон болж, бясалгал хийхээс гадна шоу цэнгээндээ хүртэл сүү тулган найрлах болсон нь ийнхүү олны анхаарлыг татсан хэрэг болжээ. “Угтаа бол, уриалга нь зөв зүйтэй алхмын нэг. Хамгийн гол нь, олны танил хүмүүсээр дамжуулан архи дарс, амьдралын буруу хэв маягийг сурталчлахын эсрэг хийж буй оновчтой үйлдэл” гэж үнэлэх хүмүүс ч цөөнгүй байна. |
