Энэ онд Монгол Япон хоёр улсын дипломат харилцаа тогтоосны 40 жилийн ой тохиож байгаа. Ойн хүрээнд хоёр орны найрамдалт харилцааг бэхжүүлэх үүднээс олон арга хэмжээ зохиож байна. Үүний нэг нь Япон улсын Засгийн газрын буцалтгүй тусламжаар Монгол улсад тэр дундаа Монголын үндэсний олон нийтийн телевизэд Японы үндэсний NHK телевизийн бэлтгэсэн кино драм, баримтат кино болон танин мэдэхүйн, хүүхэд залууст зориулсан цуврал нэвтрүүлгүүдийг бэлэглэх гэж байна. Энэ ажил хэргийн албан ёсны уулзалт 2012 оны 7 дугаар сарын 25-нд Гадаад харилцааны яаманд боллоо. Уулзалтанд Гадаад харилцааны яам, NHK интернэйшнл байгууллагын төлөөлөгчид, МҮОНТ-ийн удирдлага, Сангийн яам, Боловсрол соёл шинжлэх ухааны яамны албаны хүмүүс оролцлоо.
МҮОНТ-ийн гадаад харилцааны албаны мэргэжилтэн Б.Лхагвасүрэн “МҮОНРТ бол МРТХЭГ гэдэг нэртэй байхаасаа Японы NHK телевизтэй хамтын ажиллагаатай байсан. Манай үзэгчдийн мэдэх Ошин, Сузуран гэх мэт кино, хүүхэд залуучуудад зориулсан сургалт, танин мэдэхүйн нэвтрүүлгүүдийг авч гаргаж байсан. 2002 оноос хойш NHK интернэйшнл байгууллагатай харилцаа холбоо тасарсан байсан. Эргээд 10 жилийн дараа хамтарч ажиллах гэж байна. Японы танин мэдэхүйн болон боловсролын нэвтрүүлгүүдийн хийсэн арга барил, хүүхэд залууст хүргэж байгаа нь маш энгийнээр тайлбарлаж, ойлгомжтой хийсэн нь гайхалтай байдаг” гэж хэллээ.
NHK интернэйшнл компанийн Нэвтрүүлэг хангамж эрхэлсэн захирал Ёиши Үэно “Энэ удаа 177 телевизийн бүтээл буюу 4318 минутын нэвтрүүлгийг буцалтгүй тусламжаар нийлүүлэхээр саналаа тавиад байна. Эдгээр нэвтрүүлгээс эдийн засаг, байгаль орчин, соёл уламжлалын чиглэлийн нэвтрүүлгүүд нь бүх насныханд зориулагдсан хамгийн сүүлийн үеийн шинэлэг сайн гэсэн үзүүлэлтээр үзэгчдэд үнэлэгдсэн, мөн дунд, ахлах ангийн болон их дээд сургуулийн оюутнуудад зориулсан нэвтрүүлгүүд ч байгаа” хэмээлээ.
Мөн уулзалтын дараа NHK телевизийн салбар компани болох NHK интернэйшнл компанийн төлөөлөгчид МҮОНРТ-тэй танилцсан юм.
Япон улс улс орныхоо соёл уламжлалыг сурталчлах, хамтын харилцаагаа сайжруулах үүднээс 1982 оноос хойш манай улсаас гадна 60 орчим улс орны үндэсний телевизүүдэд нэвтрүүлгээ өгч, албан ёсоор дамжуулсан байна. Телевизийн удирдлагууд цаашид энэхүү төсөл амжилттай үргэлжилбэл шинээр гарсан олон ангит уран сайхны киног үзэгчдийн хүртээл болгох боломжийн талаар ч ярьлаа.
Олон нийтийн мэдээлэл судалгааны төв
