Польш улсаас нацистуудын авч гарсан нэрт зураач Рафаэлийн “Залуу хархүүгийн хөрөг зураг” бүтээл олдсон байна. Өдгөө энэ бүтээл банкны хадгаламжид байгаа ч чухам аль улсад гэдэг нь тодорхойгүй хэвээр байгаа юм. Польшийн Гадаад хэргийн яам энэ зургийг чухам хаана хадгалагдаж байгааг тодорхой мэдээгүй ч аюулгүй газар байгаа гэсэн мэдээлэл бийг онцолжээ. Тэд удахгүй энэ урлагийн ховор бүтээлийг эх орондоо авчирна гэдэгтээ итгэлтэй байна.
Энэ зураг 1798 онд Чарторыйский вангийн гэр бүлийн эзэмшилд орсон гэдэг. Дэлхийн хоёрдугаар дайн эхлэхээс өмнө уг бүтээл Краков хотын музейд хадгалагдаж байжээ. 1939 онд Линц хотод нээхээр төлөвлөж байсан музейд тавихаар нацистууд түүнийг дээрэмдсэн аж. Энэ хөрөг зурагтай хамт Рембрандт, Леонардо да Винчи нарын ховор бүтээлүүдийг ч авч одсон юм. Ингээд 1945 онд хөрөг зураг ор сураггүй алга болсон билээ.
Дайны дараагаар вангийн үр сад болон холбогдох байгууллагууд зургийг эрж хайсан боловч амжилт олоогүй байна. Нацистуудын дээрэмдэж авсан урлагийн бүтээлүүд дотроос энэ зураг хамгийн үнэ цэнэтэйд тооцогдож байсан юм. Түүнийг 1513-1514 онуудад туурвисан гэж үздэг. Тэр зураг дээр хэн дүрслэгдсэн нь тодорхойгүй ч зарим нэг түүхчид зураачийг өөрийгөө зурсан гэж үздэг билээ.
