Дизайнер Н.Соёлмаа үзэл бодлоо хэнээс ч эмээлгүй хэлчихдэг шударга нь дэндсэн эмэгтэй. Тиймдээ ч хөлсөө дуслуулан байж урласан загварын бүтээлийг нь хөсөр чулуудсан моделиудад алганы амт үзүүлж явсан “боевик” нөхөр гэгддэг.
Тэрбээр нэг хэсэг “Амьдралын амт” нэвтрүүлгийг бэлтгэдэг байсан ч сүүлдээ бүр уйдаж орхижээ. Цаг ямагт амьдралын тухай ярьсаар байгаад залхсан гэх түүнд “Амьдрал гэдэг бөөн философи, ярихаас ч дургүй хүрмээр айхтар хүнд сэдэв” гэсэн.
Ялангуяа улс төр, нийгмийн амьдралын талаар эрхэм дизайнераас асуувал чихээ дараад зугтаж ч мэдэх нь. “Зүгээр л өөрт оногдсон ажлаа аятайхан шиг хийгээд бусдад гай болохгүй, бас дутахааргүй амьдарвал болоо” гэж үздэг Н.Соёлмаа учир зүггүй амьдрал яриад чухал царайлах дургүй аж.
Р.Есүй
