Владимир Путиний засаглалыг эсэргүүцсэн утга агуулгатай дуу дуулж шуугиан дэгдээсэн “Пүси Райот” хамтлагийн гишүүдийн шүүх хурал баасан гаригт өндөрлөж шүүх шийдвэрээ гаргах ажээ. Тэд 2-р сарын 21-нд Москва хотын нэгэн сүмд дайран орж Путиний эсрэг панк дуу дуулж эсэргүүцлээ илэрхийлсэн юм.
Оросын Үнэн алдартны сүм орчин үеийн панк рок урсгалын эсрэг хатуу байр суурь баримталдаг нь “Пүси Райот” хамтлагийн шүүх хурлаас харагдаж байна. Ялангуяа, Владимир Путиний засаглалын доор Үнэн алдартны шашны нөлөө байр суурь их бэхжсэн. “Пүси Райот” хамтлагийн гишүүдэд тэнсэн харгалзах ял оноосон ч гэсэн олон нийтийн дунд Үнэн алдартны шашны сүмийн нэр хүнд унах нь тодорхой гэж сөрөг хүчний гишүүд тайлбарлаж байна.
Үнэн алдартны шашны тэргүүн Патриарх Кирилл “Пүси Райот” хамтлагийн гишүүдийн үйлдлийг огтхон ч хүлээн зөвшөөрөхгүй гэдгээ мэдэгдсэн. Мөн тус хамтлагийн гишүүд болох Надежда Толоконникова, Екатерина Самуцевич, Мария Алиохина нарыг баривчлан хорьсныг ч эсэргүүцэхгүй гэж мэдэгдэж байв. Хуучин дэглэмийн үед Үнэн алдартны шашны сүм нь Зөвлөлтийн эрх баригчид нягт хамтран ажиллаж улс төрийн тэрс үзэлтнүүдийг илрүүлэхэд тусалдаг байжээ. Оросын прокурорууд шашны нэр хүндийг гутаасан гурван бүсгүйд 3 жилийн ял төлөвлөсөн.
Орос улс нь албан ёсны шашингүй боловч хүн амын 70 орчим хувь нь Үнэн алдартны шашин шүтдэг гэж хариулдаг ажээ. Харин хүн амын дөнгөж 7 хувь нь сүмийн мөргөлд тогтмол оролцдог байна.
Г.Ганбаяр
