Дэлхийн томоохон нийслэлүүдийн тоонд орох Лондоны газрын зургийг график дизайнер Дэвид Райн Робинсон бүтээжээ. Ингэхдээ тэрбээр бүх зүйлийг компьютер дээрээ нарийн зурж бүтээсэн аж.
23 настай дизайнер газрын зургийг бүтээхийн тулд зургаан сарын хугацаа зарцуулжээ. Тэрбээр Олимпийн хотхон, Лондоны томоохон өргөн чөлөө, байшин барилга, Олимпийн цэнгэлдэх, Орбит цамхаг, Букингхэмийн ордон, Хойд Грийнвичийн “Арсенал” клубийн О2 цэнгэлдэх зэрэг олон арван байгууламж, байрыг зурсан байна.
Дэвид өнгөрсөн онд Салфордын их сургуулийг төгсөөд “Cartoon Network” компанид график дизайнераар ажилд орсон аж. Тэрбээр “Дэйли мэйл” сонинд өгсөн ярилцлагадаа “Би энэ оны гуравдугаар сарын 25-ны шөнө газрын зураг бүтээх санаагаа олсон. Лондоны газрын зургийг бүтээж чадна гэдэгтээ үнэхээр итгэлтэй байсан. Үүнд ойролцоогоор таван сар гаруйн хугацаа орсон” гэжээ.
Тэрбээр Лондоны амьтны хүрээлэнг бусдаас илүү нарийн зурсан байна. Ингэхдээ парк үзэгчдээр дүүрэн байгаагаар дүрсэлжээ. Харин хүмүүсийн сэтгэл хөдлөл, үйл хөдлөлийг дүрслэхэд багагүй бэрхшээлтэй байсан аж.
Хэрэв түүний бүтээсэн сонирхолтой газрын зургийг онлайнаар худалдаж авахыг хүсвэл 125 фунт стерлинг төлөх шаардлагатай. Гэхдээ мэдээж газрын зургийг унших чадвартай компьютертэй байхад л хангалттай юм.
Т.Арьяа
