Монголын хошин урлаг, кино, тайзны урлагт өөрийн өнгө төрхийг бий болгож, олон арван дүрээрээ үзэгчдийн танил болсон уран бүтээлчдийн нэг бол Төрбатын Бархүү юм.
Тэрбээр жүжигчин, дуучин, хөтлөгчийн чиглэлээр ажиллаж, “Х-ТҮЦ” продакшны тайзнаас уран бүтээлийн гараагаа эхлүүлэн Монголын кино урлагт өөрийн байр суурийг бий болгосон уран бүтээлч билээ.
Өнөөдөр түүний төрсөн өдөр.
Т.Бархүү нийслэлийн 13 дугаар сургуулийг төгсөж, багаасаа дуулах дуртай байсан нь түүнийг урлагийн замд хөтөлсөн бөгөөд улмаар СУИС-д элсэн жүжигчний мэргэжлээр суралцсан байна.
2004 онд СУИС-ийг жүжигчин мэргэжлээр төгсөөд “Х-ТҮЦ” продакшнд ажиллаж эхэлсэн нь түүний мэргэжлийн уран бүтээлийн гол гараа болжээ. Тэр цагаас хойш тус продакшны олон арван тоглолтод оролцож, хошин урлагийн тайзнаа өөрийн дүр төрхийг бий болгосон. Түүнчлэн тус продакшны тайзан дээр хошин, инээдмийн дүрүүдээс гадна өөр өөр зан чанар, сэтгэлзүйтэй олон дүрийг бүтээж, үзэгчдийн хайр хүндэтгэлийг хүлээсэн юм. Түүний тайзны бүтээлүүдийн дунд “Сэрүүн хасын нууц”, “Аянгын бороо”, “Гэм зэм”, “Зохиолгүй амьдрал” гэхчилэн зэрэг жүжгүүд багтдаг.
Т.Бархүү хошин урлагийн жүжигчин гэдгээрээ танигдсан ч кино урлагт ч авьяас, ур чадвараа харуулсаар буй. Тэрбээр “Миний хөрш чөтгөр”, “Болсон явдал”, “Худалч залуу”, “Найз”, “Алтан өндөг”, “Танхай тээгч”, “Төлөөс”, “Солиот эх”, “Хайрыг битгий гомдоо”, “Ээж”, “Эмэгтэйн кейс”, “Эгч нь эр хүн” зэрэг олон уран бүтээлд өөр өөр дүрүүдийг бүтээгээд буй.
