Японы төгөлдөр хуурч, “Зүүн гарт” хэмээн алдаршсан Изүми Татэно энэ сарын 6, 7-нд Улсын филармонид тоглох гэж байна. Энэхүү тоглолтыг Монгол, Япон улс найрамдалт харилцаа тогтоосны 40 жилийн ойн хүрээнд Японы ЭСЯ-наас зохион байгуулж буй. Түүнчлэн манай улсад хэд хэдэн удаа ирж ХБК-ийн сурагчид, симфони найрал хөгжмийг удирдсан удирдаач Хисаёши Иноүэ, Улсын филармонийн симфони найрал хөгжим тоглолтод оролцоно. Изүми Татэно хөгжмийн зохиолч З.Хангалын “Салхич шувуу”, Ёшимацүгийн “Music for Tairo no Kiyomori”, Кояамагийн “Ainu no uta for string orchestra”, Равелийн төгөлдөр хуурын концертийг толилуулах юм байна.
Изүми Татэно Токиод 1936 онд төрсөн бөгөөд долоон үе дамжсан хөгжимчний гэр бүлээс гаралтай. Тэрбээр 1960 онд Токиогийн урлагийн их сургуулийг төгссөнөөс найман жилийн дараа Францын “Olivier Messiaen International Piano Competition” нэр хүндтэй наадмын дэд байрыг эзэлжээ. Финландын The Sibelius хөгжмийн академид хорь орчим жил багшилсан тэрбээр 2002 онд цус харвасны улмаас баруун гар нь мэдээгүй болж, төгөлдөр хуур тоглох боломжгүй болжээ. Гэсэн ч Изүми Татэно зүүн гараараа хөгжимдөх болсноор авьяасаа улам хурцалж, Япон, Финландаар өртөөлөн дэлхий дахинаа алдаршсан юм.
