Түүхэн “Аравт” киноны хөгжим цогцоороо эгшиглэх “Эзлэн” тоглолт Улсын циркт энэ сарын 17-19-нд тоглогдоно. Өвөг дээдсийнхээ хийморь лундааг сэрээн бичсэн гэгдэж байгаа энэхүү бүтээлээ Б.Чинбат симфони оркестртой тоглохоор болсон нь Монголын хөгжмийн түүхэнд онцгой үйл явдлын нэг болж байна. Тоглолтонд Намсрайжавын нэрэмжит 60 хүний бүрэлдэхүүнтэй симфони оркестр, Монгол улсын дуурь бүжгийн эрдмийн театрын хоор оролцоно.
Монголын шинэ цагийн 22 жилийн сонгодог урлагийн түүхэнд симфони оркестрт зориулж хөгжим бичсэн хөгжмийн зохиолч хэд байгаа бол? Ялангуяа шинэ залуу төрөн гарч байгаа уран бүтээлчдээс ингэж бичсэн нь хэд байгаа билээ?
Б.Чинбатад өвөг дээдсийн сүнс нь энэхүү хөгжмийг “захиалан бичүүлсэн” биз ээ хэмээн хамтран бүтээл туурвидаг уран бүтээлчид нь сүслэн бодож суугаа юм билээ. Тиймдээ ч цогц уран бүтээлээрээ Монголын симфони оркестрыг сэрээн, түмэн олонд дахин шинээр толилуулъя гэсэн зоригийг нь олон нөхөд нь үнэлж, хүндэлж байгаа юм билээ. Ирсэн үзэгч, олныхоо сэтгэлийг утсыг хөндөн, урам бахдлыг нь эзэмдэхийг бэлгэдсэн “Эзлэн” тоглолт болох өдөр хэдхэн мөчийн дараа тохионо. Тэрхүү ганцхан мөч урлагт мөнхийн тамгатай байх нь гарцаагүй биз ээ.
