Америкт продюсерийн чиглэлээр долоон жил ажиллаж байгаад ирснийхээ дараа “Давтагдашгүй” тоглолтоо өнгөрсөн жил таван үдэш тоглож, өөрийгөө дахин давтагдашгүй гэдгээ харуулж байсан хөгжмийн зохиолч Б.Чинбат энэ жил өөрийгөө дахин шинээр нээн харуулах гэж байна. Түүнийг энэ удаад 60 хүний бүрэлдэхүүнтэй Улсын симфони найрал хөгжим болон Хилийн цэргийн чуулгын найрал дууны удирдаачаар харах өдөр айсуй.
Сүүлийн жилүүдэд Монгол Улсын симфони оркестрт зориулсан бүрэн хэмжээний зохиол болон тоглолт ховорхон байсан. Үүнийг сэрээн хөгжүүлж байгаа нь Б.Чинбатын “Эзлэн” тоглолтын томоохон онцлог юм. Түүнчлэн Монголын хөгжмийн түүхэнд киноны хөгжмийн анхны тоглолт энэ болох гэж байна. Энэ баримт энэхүү тоглолтыг Монголын хөгжмийн түүхийн нэвтэрхий тольд тодоор бичин үлдээх биз ээ.
Нөгөөтэйгүүр “Аравт”-ын хөгжмүүдийг “Мандухай сэцэн хатан” киноноос хойших түүхэн киноны шилдэг бүтээл хэмээн хөгжим судлаачид хэлж байгаа. Энэхүү гайхалтай сайхан бүтээл симфони найрал хөгжимтэй найрсан зохирч хэрхэн яруу тансаг аялгуу болон эгшиглэхийг мэдрэх нь үзэгч бидний хувьд ховорхон завшаан, цөөхөн тохиох боломж хэмээн харж байна.
Энэхүү гайхалтай тоглолтыг Монголын бүх л тоглолтыг өндөр төвшинд найруулдаг On’n Off продакшн найруулж байгаа нь бүр үзүүштэй, сонирхууштай болгож байна.
www.urlag.mn babu
