Монголын урлагийн төрлийн Сонгодог нь хэмээн нэрлэгддэг дуулалт жүжгийн төрөлд нэгэн шинэ бүтээл мэндэлхээр Нийслэлийн “Улаанбаатар” чуулгын тайзнаа “Гоолингоо” дуулалт жүжиг бэлтгэгдэж байна.
Энэ сарын 10-нд нээлтээ хийж 5-н өдөр тоглогдох уг жүжиг нь Нийслэлийн “Улаанбаатар” чуулгын өвөл цагийн нээлт болж буй шинэ уран бүтээл бөгөөд зохиолч, найруулагчаар нь МУСТА С.Баярсайхан, хөгжмийн зохиолчоор нь МУУГЗ Ш.Аюуш нар ажиллаж байгаа ажээ.
Хагас зуун саяын өртгөөр бүтэж буй тус жүжгийн гол дүрд МУГЖ Г.Ариунбаатар, МУГЖ Г.Хонгорзул, МУСТА Б.Батболд, МУСТА Г.Отгонцэцэг нар тоглож байгаа гэнэ. Тус жүжиг мэргэжилийн өндөр түвшинд хийгдэж байгаа бөгөөд тайз, гэрэл шум, жүжигчдийн хувцас хэрэглэл бүгд зөвхөн энэ жүжигт зориулагдан бүтээгдэж буй гэнэ.
Тус жүжгийн хяналтын зөвлөлөөр АЖ Б.Мөнхдорж, МУСГЗ О.Соёлт, МУУГЗ Б.Баатар, МУУГЗ Ч.Ганхуяг нар сонгогдон ажиллаж байгаа ажээ.
Түүнчлэн Нийслэлийн “Улаанбаатар” чуулгын бүх уран бүтээлчид оролцон тоглож байгаа бөгөөд үндэсний хөгжмийн "Хангарьд" найрал “Гоолингоо” дуулалт жүжгийн хөгжмийг бүрэн бүрэлдхүүнээрээ тоглож байгаа юм байна.
Та бүхнийг урлагийн тэнгэр ивээх болтугай…
www.urlag.mn
