Засгийн газраас жил бүр хүүхэд багачуудад зориулсан уран бүтээлийг олшруулах зорилгоор тайз дэлгэцийн бүтээлийн зохиолын уралдааныг зарлаж, түрүүлсэн бүтээлийг тайз дэлгэцэнд тавихад зориулан санхүүжилт олгодог болоод нэлээдгүй хугацаа өнгөрсөн ажээ.
Тус хөтөлбөрийн хүрээнд засгийн газрын хэрэгжүүлэгч агентлаг Соёл, урлагийн хорооноос \Хуучнаар\ зарласан 2012 оны энэ тендерт зохиолч Ц.Түмэнбаярын "Мөрөөдлийн үзэг" зохиол \Төслийн баг\ шалгарсан нь ийнхүү бүтээл болон төрж сурагчдын амралтаар нээлтээ хийнэ тайзнаа тоглогдох гэж байна.
Жүжгийн ерөнхий найруулагчаар Ардын жүжигчин, Урлагийн гавьяат зүтгэлтэн Б.Мөнхдорж, телевизийн найруулагчаар МУСГЗ Б.Жаргал, хөгжмийн зохиолчоор Төрийн шагналт Б.Мөнхболд, тайзны зураачаар "Гэгээн Муза"-гийн эзэн О.Баярмагнай, ассент найруулагчаар Г.Содбилэг нар ажиллаж байна. Зохиолч Ц.Түмэнбаяр “Мөрөөдлийн үзэг” хүүхдийн драмын жүжгээ “Сумтай үзэг” өгүүллэгээсээ сэдэвлэн бичжээ.
Энэ нь шилжлтийн үе болох 12-15 насны хүүхдийн сэтгэхүйн онцлогт тохируулан бүтээсэн жүжиг юм байна. Ер нь ахлах ангийн юм уу эсвэл бүр бага анги, бага насны хүүхдэд зориулсан бүтээл их байдаг тул энэ удаа хамгийн эгзэгтэй насныханд зориулсан бүтээлээр жүжиг тавьж байгаагаараа онцлог гэнэ.
Жүжгийг тайзнаа тавихад Нийслэлийн “Улаанбаатар” чуулга хамтран ажиллаж байгаа бөгөөд сурагчдын амралтыг тохиолдуулан энэ сарын 13-аас 16ны хооронд нээлтийн тоглолтоо хийх ажээ.
Жүжигт "Хөх гацуурхан" театрын жүжигчид оролцон тоглож байгаа бөгөөд энэ жүжгээрээ театрынхаа албан ёсны нээлтийг хийж байгаа юм байна.
Ийнхүү 14-16-ны өдрүүдэд 12-15-н цагуудаас Нийслэлийн “Улаанбаатар” чуулгын тайзнаа, 17-нд Монголын хүүхдийн ордны тайзнаа жүжигийг тоглох юм байна.
Дэлгэрэнгүй мэдээллийг 99249466, 89004147 дугаарын утсаар лавлах боломжтой юм.
