Монголын зохиолчдын эвлэлийн гишүүн, Г.Сэр-Одын шагналт, Яруу найрагч Ч.Дагмидмаагийн “Тэнгэрийн хөх Монгол” хэмээх шинэ бүтээлийг, гар бичмэлийг нь хавсарган эрхэм уншигч танд хүргэж байгаадаа таатай байна. Найрагт дуртай уншигчдын маань хэдийний танил яруу найрагч бүсгүй энэхүү шүлгээ 2012 оны 11 дүгээр 14-нд буюу Монгол бахархлын өдөр бичжээ. Тэрээр энэ шүлгээ дуу болгон түмэндээ хүргэх хүслээр бичихдээ МУГЖ Т.Ариунаад онцгойлон зориулсан юм байна. Мэдээж МУГЖ Т.Ариунаа гайхалтай дуучны хувиар өөрт нь зориулсан энэхүү шүлгийг хүлээн авах биз ээ. Ингээд та бүхэндээ “Тэнгэрийн хөх Монгол” шүлгийг хүргэж байна.
“Тэнгэрийн хөх Монгол”
Газрын зураг дээр асгасан
Олоон хөх шагай
Наран дотор хөвөрсөн
Жингийн хөх цуваа
Сар даган нүдэлсэн
Лусын хөх тэргүүн
Салхи жигүүрлэж нисэлдсэн
Дорнын хөх шувууд
Тоонын дор тамхи нэрсэн
Галын хөх өвгөд
Тотгон дээр мөс тавьсан
Цайны хөх эмгэд
Монгол… Монгол…
Газрын зураг дээрээс
Хэзээ ч нүүж алга болохгүй
Галаа өрдөхөө больж
Наранд гараа ээхгүй
Өргөө гэрээ үгүйрүүлэн
Сарыг сүүгүй хонуулахгүй
Айраг найраа хоосолж
Ширэн хөхүүр хатаахгүй
Хүнийг гэрээс нь бэрийн ёсоор гуйж авдаг
Хүн нь үнэ цэнэтэй дэлхийн дээд соёл
Мал буянаа лус хурмастаар сэтэрлэн онголж
Тэнгэрийн харьяат болгодог ертөнцийн их ариусал
Нүүж холдохгүй нурж зугтахгүй уул талдаа
Гэрийн бууриар тамга тавьж хойчдоо үлдээсэн
Монгол… Монгол…
Цус нь бохирдоогүйг илтгэсэн
Гүн хөх тэмдэгтэй
Сэтгэлийн хирийг ариулсан
Сүү цайны дээжтэй
Тэнгэрт морьдоо сойсон
Эрийн гурван наадамтай
Дэлхийн түүхэнд магнайлсан
Суут Чингисийн домогтой
Монгол… Монгол…
2012.11.14 “Монгол бахархлын өдөр” Монгол Улсын Гавьяат Жүжигчин Төмөрийн Ариунаад зориулав аа.. Монголын Зохиолчдын Эвлэлийн Гишүүн, Г.Сэр-Одын шагналт, Яруу найрагч Ч.Дагмидмаа
