Та бидний сайн мэдэх ‘’Take me to your heart’’ синглээрээ 2006 оны хамгийн их борлуулалттай дуунуудын жагсаалтыг тэргүүлсэн “Michael Learns to Rock” хамтлаг UB Паласын концертийн их танхимыг 2 өдөр доргиох нь ээ. 12 сарын 7, 8-ны үдэш 19.00 цагт Монголын фэнүүдтэйгээ уулзах тоглолтын тасалбар эрэлт ихтэй байгаа аж.
Хамгийн анх удаагаа онлайнаар www.evento.mn хаягаар захиалж авах боломжтой, өрнөдийн орнуудын жишгээр ухаалаг карт хэлбэрээр гарч байгаа тус хамтлагийн тоглолтын тасалбарын үнэ 40 000 төгрөгнөөс эхэлж байгаа юм байна.
Суудлынхаа байрлалаасаа хамааран билетийн үнэ нь 40 000, 60 000, 80 000 төгрөг гэсэн ханштай байгаа хэдий ч тасалбар нь худалдаанд гарсан өдрөөсөө л эрэлт ихтэй борлогдож эхэлжээ. Мөн тоглолтын тасалбарыг Монголын Залуучуудын Холбооны төв байр, “Улаанбаатар Палас”-ын кассаар, Hi-Fi рекордсын бүх салбаруудаар болон 1109 утсаар захиалан үнэгүй хүргүүлж авах боломжтой аж.
Та бидний зүрх сэтгэлд хоногшсон дуунуудаараа Монголын фенүүддээ бэлэг барихыг хүсэж байгаа тухайгаа хамтлагийн гишүүд ч өөрийн цахим хуудсандаа нийтэлжээ. Монголын фен мянга мянган залуус “Michael Learns to Rock” хамтлагийн тоглолтыг тэсэн ядан хүлээж байна.
