1990-ээд онд дэлхийн амьд хөгжмийн ертөнцөд ноёрхож байсан “Take me to your heart”, “Paint my love”, “Sleeping child” зэрэг алдарт хитүүд нь Монголчуудын зүрх сэтгэлд хоногшсон “Michael Learns to Rock” хамтлаг 12 сарын 7,8-нд UB Паласын концертийн их танхимд тоглолтоо хийж Монголын фенүүдтэйгээ уулзах гэж байна.
Тус хамтлагийг Монголд урьсан “Evento” ХХК болон зохион байгуулагчаар ажиллаж буй Монголын Залуучуудын Холбоо хамтран 11-р сарын 16-нд “Blue Sky”-д хэвлэлийн бага хурал хийсэн юм.
Энэхүү хамтлагийн талаарх анхны хэвлэлийн бага хуралд УГЗ, Монголын Рок Поп Пентатоник Академийн Ерөнхийлөгч Б.Долгион, “Шар айраг” хамтлагийн ахлагч Г.Ганхүү, Монголын Залуучуудын Холбооны Ерөнхийлөгч А.Мөнхбат, “Evento” ХХК-ийн захирал Х.Батжаргал нар оролцон тоглолтын талаар тодорхой мэдээлэл өгсөн юм.
Дэлхий даяар нийт цомгууд нь 11 сая хувь борлогдсон, Америк, Европ, Азид дээгүүр жагсдаг алдартай хамтлагуудын нэг “Michael Learns to Rock” хамтлаг аялан тоглолтдоо сонсогчдын чихэнд хоногшиж, хит болсон дуунуудаа эгшиглүүлнэ. “Michael Learns to Rock” хамтлагийн гишүүд “Чингис хааны өлгий нутагт тоглолтоо хийх гэж байгаадаа баяртай байна. 12 сарын 7, 8-нд Улаанбаатар хотод уулзацгаая” хэмээн хамтлагийнхаа вэб хуудсаар дамжуулан мэдэгдсэн байна. Тус хэвлэлийн бага хурлын үеэр уг тоглолтыг зохион байгуулуулагчдаас товч мэдээлэл авсан юм.
