Дэлхийн сонгодог урлагийн театрууд шинэ жилийн баярын өмнө П.И.Чайковскийн “Щелкунчик” буюу “Цөмөөхэй” балетийг тоглодог уламжлалтай. Монголчууд бид ч Дуурь, бүжгийн эрдмийн театртаа энэхүү балетыг шимтэн үздэг билээ. Тэгвэл энэ жил Монголын “Цөмөөхэй” балет хилийн дээс алхан БНХАУ-ын Тяньжин хотыг зорих нь ээ. ДБЭТ-ын энэ аялан тоглолт нь олон улсын хэмжээнд анх удаа хамгийн олон хүний бүрэлдэхүүнтэй буюу 150 уран бүтээлчийг хамарна гэдгээрээ онцлогтой аж.
Тяньжины “Grand Theater”-ын урилгаар Монголын сонгодог урлагийнхан гурав хоногийн турш “Цөмөөхэй”-гээ тайзнаа амилуулах юм. Арванхоёрдугаар сарын 20-нд ДБЭТ-ын баг өмнөд хөршийг зорин 24-26-нд “Цөмөөхэй” балетыг тоглох ажээ. Балетын найрал хөгжмийг Урлагийн гавьяат зүтгэлтэн Н.Туулайхүү, монголчуудын эртний танил, Стэнфордын их сургуулийн профессор, тус сургуулийн хөгжмийн тэнхмийн эрхлэгч, “Пан Ази” хөгжмийн фестивалийн ерөнхий зохион байгуулагч, хөгжим судлаач, удирдаач ноён Жин Дун Цай нар ээлжлэн дохих нь. Сонирхуулахад, Тяньжиний “Grand Theater”-ын “Opera house” нь 1600, концертийн танхим нь 1200 суудалтай аж.
