Монголын урлагийн ажилтны холбооноос санаачлан, Соёл, спорт, аялал жуулчлалын яамтай хамтран орон нутгийн театр, чуулгуудын дунд “Сонгодог бүтээл-2012” шилдэг бүтээл шалгаруулах улсын уралдааныг амжилттай зохион байгуулж байгаа билээ. Тус уралдааны эхний шатны шалгаруулалтанд 22 аймгийн 24 театр, чуулгууд 48 бүтээлээрээ өрсөлдсөн бөгөөд нийт гурван бүсэд хуваарилагдаж өнгөрсөн аравдугаар сарын 21-нээс арваннэгдүгээр сарын 29-ны хооронд зохион байгуулагдсанаас Завхан аймаг, Дархан-Уул аймаг, Өвөрхангай аймаг, Орхон аймгийн мэргэжлийн урлагийн байгууллагууд шалгаран үлдсэн бөгөөд ССАЖЯамнаас тус бүрд нь 7 /долоон/ сая төгрөгний урамшуулал олгосон байна. Түүнчлэн өрсөлдсөн бүх чуулгуудаас Орхон аймгийн “Уурхайчин соёлын ордон”-ы “Эрдэнэт” дуу бүжгийн чуулга шалгаран үлдэж 20 сая төгрөгний урамшуулал хүртэж Улаанбаатар хотноо болох эцсийн шатны шалгаруулалтад оролцох эрхээ авжээ.
Уралдааны II дугаар шатны шалгаруулалт Улаанбаатар хотноо энэ сарын 11-16 хооронд зохион байгуулагдах бөгөөд УДЭТ-н тайзнаа бүсээс шалгарсан театрууд уран бүтээлээ үзэгчиддээ толилуулж шилдэгийн шилдэгээ тодруулан 35 сая төгрөгний эзнийг тодруулах юм байна.
Шилдэгийн шилдэгт өрсөлдөж буй театруудын бүтээлүүдийг танилуулъя
-Баруун бүс- Завхан аймгийн Төрийн шагналт, Урлагийн Гавьяат зүтгэлтэн Л.Ванганы нэрэмжит Хөгжимт драмын театр
“Этүгэн чимэгт аялгуу” концерт
А.П.Чехов: “Ванья ах” жүжиг
-Төвийн бүс- Дархан-Уул аймгийн “Залуучууд театр”
Г.Перселл “Дидона Энейхоёр”дуурь
Г.Ибсен “Нора”
-Зүүн бүс-Дорнод аймгийн Хөгжимт драмын театр
Симфони найрал хөгжмийн “Сонгодог концерт”
Г.Ибсен “Нийгмийн дайсан” бүтээлүүд
Мөн урилгаар Орхон аймаг-Уурхайчин соёлын ордон “Эрдэнэт ДБЧ” “Зүүдний Соннамбула” сонгодог концерт, Хэнтий аймаг-Хан-Хэнтий чуулга “Бурхан Халдуны дуулал”концерт, Орхон аймаг-Хүүхэд залуучуудын театр “Гайхам ертөнц” хүүхэлдэйн сонгодог концертоо үзэгчдэд толилуулах ажээ. Ийнхүү 400 гаруй сая төгрөгний санхүүжилтттэйгээр зохион байгуулагдаж буй “Сонгодог бүтээл-2012” шилдэг бүтээл шалгаруулах улсын уралдааны зохион байгуулагчид маргааш 12:00 цагаас “Монгол ньюс” мэдээллийн төв дээр сэтгүүлчдэд дэлгэрэнгүй мэдээлэл хийх гэнэ.
Та бүхнийг урлагийн тэнгэр ивээг…
www.urlag.mn
