Соёл спорт аялал жуулчлалын яам, Улсын Драмын Эрдмийн театр, Монголын зохиолчдын эвлэл хамтран мэргэжлийн урлагийн байгууллагын урын санг баяжуулах зорилгоор “Орчин үеийн жүжгийн зохиол”-ын уралдаан зарлажээ. Энэхүү уралдаан нь жүжгийн зохиолчдын идэвхи санаачилгыг дэмжих, зохиолчдын бүтээл туурвилыг тайзны бүтээл болгон олон нийтэд хүргэх зорилготой юм.
Уралдаанд оролцох бүтээл нь орчин үеийн сэдэвтэй байна. Байр эзэлсэн бүтээлүүдийн шагналыг ирэх оны нэгдүгээр улиралд багтаан зохиогчид олгох бөгөөд шалгарсан бүтээлүүд нь Төрийн өмч болох аж. Нэгдүгээр байр эзэлсэн зохиолч 10 сая төгрөг, хоёрдугаар байр зургаан сая, гуравдугаар байр дөрвөн сая төгрөг, тусгай байранд гурван зохиолчийг шалгаруулж тус бүр нэг сая төгрөг олгох юм байна. Уралдааны бүтээлийг нэгдүгээр сарын 15-20-ны хооронд Улсын драмын эрдмийн театрт авах бөгөөд уралдааны дүнг ирэх оны хоёрдугаар сарын нэгний дотор Соёл, спорт, аялал жуулчлалын сайдын тушаалаар байгуулагдсан комисс дүгнэх юм.
www.urlag.mn Ayu
