Алдарт “Битлз” хамтлагийн Америк даяар хийсэн анхны аялан тоглолтын үеэр авсан, өнгөт зургуудыг /Өмнө нь хэвлэж байгаагүй/ үнэ хаялцуулан худалдахаар болжээ. Үүнд “Битлз” хамтлагийн 1964 оны наймдугаар сард Америкт хийсэн тоглолтын үеэр авсан тайзны болоод бэлтгэлийн үеийн 65 зураг багтсан байна. “Битлз” хамтлаг өөрсдийн өнгөт зургуудаар слайд хийж, 1965-1966 оны хооронд хийсэн тоглолтынхоо үеэр үзүүлэх видео бичлэгүүддээ өргөнөөр ашигладаг байжээ.
Эдгээрээс хамгийн алдартай нь тус хамтлагийн 1965 онд Нью-Йорк хотын “Ши” цэнгэлдэх хүрээлэнд тоглохдоо ашигласан өнгөт видео бичлэг бөгөөд тухайн үед шоуг “BBC” телевизээр шууд дамжуулж байсан аж. “Битлз”-ийн зургуудыг ирэх гуравдугаар сарын 22-нд буюу хамтлаг “Please Please Me” нэртэй анхны цомгоо 1963 онд гаргасны 50 жилийн ойн өдрөөр дуудлагаар худалдахаар болсон байна. Эдгээр зургийг Английн Стокпорт жижиг хотод “Omega Auctions”-нд дуудлагаар худалдах бөгөөд 10-15 мянган фунт стерлингээс эхлэн үнэ хаялцуулах гэнэ. “Битлз” хамтлагийн ховор зургуудыг физикийн шагналтан Роберт “Боб” Бек гэгч дарсан бөгөөд тэрээр судлаач, зохион бүтээгч байсан аж. Роберт “Боб” Бекийг 2002 онд таалал төгссөний дараа түүний Холливуд дахь гэрээс маш олон тооны зураг, слайд бүхий архив олдож байжээ.
