"Хүннү" гүрэн байгуулагдсаны 2222 жилийн ойд зориулан туурвисан зохиолч, сэтгүүлч Б.Цогнэмэхийн “Тэнгэрийн хүү” жүжгийг Б.Наранбаатар найруулагч найруулан тавьж олны дунд шуугиан тарьж чадсан. Тэгвэл энэ жүжгийг хүүхэлдэйн кино болгох гэж байгаа юм байна.
Жүжгийн зохиолч Б.Цогнэмэх энэ талаар “Хүүхэд багачуудад түүх соёл, ёс заншлаа өгүүлсэн, ойлгуулсан хүүхэлдэйн кино урлаг хомс байна. Монголчууд хүүхдээ хүмүүжүүлэхдээ түүх соёл эрхэмлэх зүйлээ тэр бүр бичиж үлдээдэггүй. Үлгэр туульсийн хэлбэрээр ярьж ойлгуулж ирсэн. Тэр хүүхэд насанд хүрэхдээ энэ чинь миний, бидний өвөг дээдсийн түүх байж гэдгийг ухаардаг. Иймээс өнөөдөр Хүн гүрний Модуны нэрийг мэдэхгүй монгол хүн байхгүй. Энэ бол сэтгэлээс сэтгэлд өвлүүлж үлдээх ухаан. Тэгэхээр монголчууд ийм агуу, дайчин, асар их өв соёлтой улс шүү гэдгийг дэлхийд харуулах арга бол хүүхэлдэйн кино юм. Хүүхдүүд “Хүн аалз” хүүхэлдэйн кино үзээд номыг нь бариад гүйх биш. Өөрийн өвөг дээдэс, Модуны хүүхэлдэйн кинонд шимтэж хөргийг нь үзээд, номыг нь уншаад бариад гүйгээсэй гэж л үүнийг хийхээр санаа шулуудсан юм” хэмээсэн байна.