Монголчууд бидэнд мартагдах дөхсөн хөгжмийн зэмсгүүдээр “BRO’S records”-ын уран бүтээлчид “Ертөнц” цомгийг эгшиглүүлэн уншигчдын гарт хүргэлээ. Өнөөдөр 11 цагт “Ертөнц” цомгийн хэвлэлийн бага хурал “Blue sky”-т болох гэж байна. Хөгжим сонирхогч, урлагийнханы сонирхолыг татаад байсан уг цомог ийнхүү худалдаанд гарахдаа дэлхий даяар байрших itunes, xbox music, amazon.com, iHeart radio, muve music, google play, simpy, media.net зэрэг 16 цахим сүлжээнд хэдийнээ борлуулагдаад эхэлжээ. Өнгөрсөн арваннэгдүгээр сард “BRO’S records”-ын уран бүтээлчид “Ертөнц” цомгоо танилцуулах тоглолтыг хийсэн бөгөөд тэнд ирсэн зочид тэнгэрт ойрхон тухалж, тэндээс ертөнцийг сонордсон юм.
“Уулс”, “Онгод”, “Салхи”, “Тэнгэр”, “Ус”, “Хурай хурай хурай” бүтээлүүдээ сонсогчдыг байлдан дагуулаад байгаа уг цомгийг анх “Mongolia the canorous” хэмээн нэрлэж байсан ч дараа нь “The canorous” болгон өөрчилсөн байна. Харин одоо Монголын эртний хувьсан өөрчлөгдсөн хөгжмийн зэмсгээр шинэ цагийн ethno electronic, chillout ,world music, new age зэрэг урсгалаар эгшиглэх цомог байгалийн дуу чимээтэй хоршин “Ертөнц” нэрээр хүрэх гэж байна. Уг цомог Монголын түүх соёлын биет ба биет бус өв соёл, ардын хөгжмүүдийг судалсан судалгаандаа тулгуурлан зохион найруулж, бичлэгийг нь хийсэн гэдгээрээ өвөрмөц, онцлог бүтээл бөгөөд монгол ардын хувис, товшуур, хэц, хэл хуур зэрэг хөгжмийг сэргээн хөгжимдөж эгшиглүүлсэн аж. Тиймдээ ч “Ертөнц” цомгийг бүтээхэд чамгүй хугацаа шаардагджээ.
Цомгийн хөгжмийн зохиолчоор Г.Онон, продюссераар М.Болд ажилласан юм. Та “Ертөнц” цомгийн талаарх дэлгэрэнгүй мэдээллийг www.bros.mn цахим хуудсаар болон www.facebook.com/BrosRecords фэйсбүүк хуудсаар дамжуулан аваарай.
Г.ДАША
Таныг урлагийн тэнгэр ивээг
urlag.mn