Дуучин Бейонсе Америкийн “HBO” телевизтэй хамтран бүтээж буй намтарчилсан баримтат киноныхоо трейлерийг цацлаа. “Life is but a Dream” нэртэй кинонд Бейонсегийн амьдралыг хүүрнэх бөгөөд тун удахгүй үзэгчдийн хүртээл болох юм. Дуучин бүсгүй албан ёсны цахим хуудсаараа дамжуулж өчигдөр киноны трейлерийг танилцуулсан байна.
Өөрийнх нь тайлбарласнаар тус кинонд Бейонсег хувь хүн талаас нь нээж, харуулахыг хичээсэн гэнэ. Киноны талаар дуучин бүсгүй “Би үргэлж өөрийн чадах бүхнээ хийхийг зорьдог. Олны танил хүмүүсийг мөнгөтэй, баян чинээлэг, нэр алдартай гэдгээр нь хүлээж авдаг. Гэтэл бид ч бас хүн шүү дээ. Бусдын л адил уйлж, гуньж, айж, бухимддаг. Тиймээс өөрийгөө хувь хүн талаас нь илүү дэлгэрэнгүй харуулахыг зорилоо” гэсэн байна.
“Life is but a Dream” баримтат кинонд Бейнсе хэрхэн амжилтад хүрсэн түүх, туулж өнгөрүүлсэн амьдралын замнал, баяр баясгалан, хүнд бэрхийг өгүүлэхээс гадна Жей Зитэй гэрлэж, охин Блю Айвигаа тээж төрүүлсэн үеийн ховор дүрс бичлэг, гэрэл зургийг анх удаа олон нийтэд дэлгэх юм.
Киноны найруулагчаар дуучин бүсгүй өөрөө ажиллажээ. Тус кино ирэх хоёрдугаар сарын 16-наас “HBO” телевизээр цацагдах аж.
