Гавьяат жүжигчин, ДБЭТ-ын баритон Э.Амартүвшин Испанид дэлхийн алдарт тенор Francesc Viñas-ын нэрэмжит олон улсын дуулаачдын уралдаанд амжилттай оролцон хагас шигшээд шалгаран үлджээ. Тэрээр өөрийн фейсбүүк хуудсаараа дамжуулан энэхүү баярт мэдээг хуваалцсан юм. Алдарт тенор Francesc Viñas-ын мэндэлсний 150 жилийн ой, Francesc Viñas-ын нэрэмжит Oлон улсын дуулаачдын уралдааны 50 дахь жилийн ой тохиож буй.
“Gran Teatre del Liceu” театрт зохиогдож буй уг уралдаанд 18-35 насны 40 уран бүтээлч оролцож, удирдаач Gueràssim Voronkov-ын удирдлаган дор “Gran Teatre del Liceu”-ын симфони оркесторын хамт уран бүтээлээ эгшиглүүлж байгаагаас хагас шигшээн шалгаруулалт энэ сарын 13-наас эхэлсэн байна.
Уралдааны тэргүүн байр буюу алтан медалийн эзнийг 20 мянган еврогоор шагнах ба түүнд Мадридын “Teatro Real”-ын дараагийн улирлын тоглолтын гэрээг санал болгох аж. Түүнчлэн, мөнгөн медалийн эзэн арван мянган евро, хүрэл медалийн эзнийг долоон мянган еврогоор шагнах юм байна.
Уралдааны шилдэгүүд энэ сарын 20-нд тодорно.
urlag.mn
