Монголын шоу нэвтрүүлгийн ертөнцөд урд хожид байгаагүй өндөр шагналын санг зарлаж, залууст хүсэл мөрөөдлөө бодит биелэл болгох маш том гайхалтай боломжийг олгосон “Камертон 2” шоуны ялагчид тун удахгүй тодрох нь ээ. Таван үе шатын турш оролцогчдын дуулах ур чадвар, бүтээлч сэтгэлгээ, хөдөлмөрч дайчин зан, дуун дээрээ ажиллах чадвар зэргийг харгалзан үзэж дүгнэлтээ гаргаж байсан шоуны шүүгчид хамгийн гол нь амьдаар дуулах чадвартай, олон жилийн туршид хүчирхэг, үнэ цэнэтэйгээр оршин тогтнох хамтлаг гаргаж ирэх зорилготойгоор ажиллаж байгаа юм. Мөн “B production”-ын захирал Төрийн соёрхолт дуучин Д.Болд шинээр гарах хамтлагийн дуунуудыг зохиогоод эхэлсэн талаарх таатай мэдээллийг бид өмнө нь хэлж байсан билээ. Оролцогчдын хувьд дуулах ур чадвартай оролцогчид шалгарч үлдсэн гэдэг нь хоёр, гурав, дөрөвдүгээр шатны шалгаруулалт болон саяхан гаргасан акаппелла дууны клипнээс нь харж болно.
“Камертон 2” шоунаас төрөн гарах хөвгүүдийн хамтлагийн дөрвөн гишүүн энэ сарын 19-нд 19.20 минутаас, 20-ны 18.20 минутаас “Боловсрол” суваг телевизээр гарах шууд нэвтрүүлгийн үеэр шалгарах юм байна. 150 сая төгрөг, таван жилийн продюсингийн гэрээний эздээр ямар азтай аавын хүүхдүүд тодрох бол…
news.mn