Холливудын жүжигчин Ума Турман өнгөрсөн оны долдугаар сард нярайлж, охин төрүүлснээс хойш дэлгэцэнд гарсангүй. Тэрээр бүх цагаа нялх үрдээ зориулж, гэр бүлийн жаргал эдэлж буй ажээ. Охиндоо Розалинд Аруша Аркадина Алталун Флоренс хэмээх нэр өгсөнд шүтэн бишрэгчид бүр гайхаж орхисон юм. Тиймээс ганцхан охинд тавын таван нэр өгснийхөө учрыг Ума Турман тайлбарлах шаардлага гарчээ.
Тэрээр Жимми Фэллоны үдшийн шоу ярилцлагад оролцохдоо ийн ярьсан байна. “Миний охин Майя л энэ санааг гаргасан юм. Хэдийгээр бид бага охиноо Луна гэж дууддаг ч гэсэн хамгийн дуртай нэрнүүдээ нийлүүлээд албан ёсны нэр болгочихьё гэж ярилцсан юм. Тэгээд ч ирээдүйд миний охин өөрийнхөө албан ёсны энэ урт нэрнээс хүүхдүүддээ өгч болно шүү дээ” гэж Ума Турман хэлсэн байна.
Харин 42 насандаа хүүхэд төрүүлж зүрхэлсэн талаараа “Би үүнийг тийм содон зүйл гэж үзэхгүй байна аа. Бид чинь эрүүл мэндийн шинжлэх ухаан маш их хөгжсөн үед амьдарч байна шүү дээ. Тиймээс зөвхөн насаар хязгаарлаж, хүүхэд төрүүлэхгүй байна гэдэг дэмий зүйл болчихсон. Эмэгтэй хүн бие сайтай л байвал ямар ч насандаа хүүхэд төрүүлж болно шүү дээ. Залуугийнх шигээ хүүхдэдээ анхаарал тавимаа байвч мөнгөний төлөө ажиллахаас өөр аргагүй болдог үе ард хоцорсонд баяртай байна. Би одоо л хүүхдээ өсгөж хүмүүжүүлж, дэргэд нь байгаагаасаа жинхэнэ таашаал авч байна” гэж Умар Турман ярьсан байна. Ума Турманы нялх охины эцэг нь тэрбумтан Арпат Буссон юм.
www.URLAG.MN
