Утга зохиол нийгмийн ажилтны дээд сургуулийн хамт олон өчигдөр “Болор цом”-ын шагналт төгсөгчдөө хүлээн авч уулзжээ. Уулзалтанд 2012 оны “Болор цом – 30” наадмын эзэн, яруу найрагч Н.Гантулга, Монголын зохиолчдын эвлэлийн болон Г.Сэр-Одын шагналт яруу найрагч Ц.Эрдэнэбаатар, Л.Ганзул, яруу найрагч Б.Болорцэрэн, Ш.Анхтуяа, Л.Торой нар хүрэлцэн ирсэн байна. Мөн “Болор цом 2007” наадмын эзэн болсон Ш.Лхамноржмаа, “Болор цом” наадын дэд болон гутгаар байрын эзэн Г.Сэр-Одын шагналт яруу найрагч О.Цэнд-Аюуш, “Болор цом” наадамд амжилттай оролцсон “Өдрийн сонин”-ы сэтгүүлч Э.Энхболд нар хүрэлцэн ирсэн аж. Уулзалтлын үеэр тэд сургуулийнхаа багш оюутнуудад яруу найрагт хөтөлсөн зам нь Утга зохиол нийгмийн ажилтны дээд сургууль, эрдэмтэн багш нар байсныг дурсан ярьж байлаа. Мөн уулзалтанд яруу найрагч, сэтгүүлч Ж.Сарантуяа, МҮОНР-ийн сэтгүүлч н.Баттөмөр, яруу найрагч Чулуунцэцэг нар хүндэт зочдоор уригдан ирсэн бөгөөд тэд яриандаа Утга зохиол нийгмийн ажилтны дээд сургуулиас олон зохиолч, “Болор цом”-ын эзэд төдийгүй хэвлэл мэдээллийн чадварлаг олон сэтгүүлчийг төрүүлэн гаргасан “Монголын Горький” хэмээн онцлон дурьдаж байсан юм. Уулзалтын төгсгөлд тус сургуулийн захирал, шинжлэх ухааны доктор Ш. Цэнд- Аюуш төгсөгчдөдөө уран бүтээлийн амжилт хүсээд дурсгалын зүйлс гардууллаа.
Дашрамд дурьдахад, тус сургуулийн төгсөгчдөөс Г.Сонинбаяр, Л.Ганзул нар саяхан Монголын зохиолчдын эвлэлийн шагнал хүртсэн байна.
www.URLAG.mn
