“Алтан хальс” холбоо, Монголын урлагийн зөвлөлтэй хамтран Оросын шинэ үеийн алдарт найруулагч Андрей Звягинцевийн “Цөллөг” киног ирэх сарын 2-ны бямба гаригийн 14.00 цагт “Улаан гэр” галерейд гаргах гэж байна. 2007 оны Каннын наадмын дэлгэцнээ анх танилцуулсан уг бүтээл “Palme d’Or”-т нэр дэвшиж, гол дүрийн жүжигчин Константин Лавраненко наадмын шилдэг эрэгтэй жүжигчний шагналыг хүртсэн түүхтэй. Шүүмжлэгчид уг киног суут Андрей Тарковскийн сүүлийн бүтээл “Амин тахилга”-тай эн тэнцэхүйц сод туурвил хэмээн үнэлсэн нь ч бий. Дүрүүдийн үл тайлагдах дотоод ертөнц, амьдралын бясалгал, хөдөө тосгоны ахуй, байгалийн үзэмж кинонд сүлэлджээ. Дашрамд дурдахад “Алтан хальс” холбооны “Dreamer’s day” кино өдөрлөг цаашид Хаан банкны төв салбарт байрлах “Улаан гэр” галерейд байнга гарах юм.
Э.Ийнгаа
