Дуучин бүсгүй Рианна хуучин найз залуу Крис Браунтайгаа харилцаагаа сэргээж, ойрд тэд салж хагацахгүй үргэлж хамтдаа байгаа юм. 2009 онд Крис Браун “Грэмми”-ийн шагнал гардуулах ёслолын өмнөхөн Рианнаг зодож, хүний нүүр харахын аргагүй хөх няц болгосон нь дуулиан тарьсан удаатай. Үүний дараагаар Рианна Крис Браунаас харилцаагаа бүрэн тасалсан ч гэсэн өнгөрсөн оны сүүлчээр тэд хамтдаа үзэгдэх болсон юм.
Тэгвэл саяхан 24 настай Рианна яагаад өөрийг нь зодсон залуутай эргэж нийлснээ хэвлэлд анх удаагаа тайлбарлажээ. “Би хамгийн гол нь аз жаргалтай байх л чухал гэж үзсэн. Тиймээс бусдын юу гэж хэлэх нь надад огт хамаагүй. Би алдаа хийлээ ч гэсэн энэ зөвхөн миний алдаа байх болно” гэж Рианна Rolling Stones сэтгүүлд өгсөн ярилцлагадаа хэлжээ.
“Бид хоёр урьдынх шигээ муудалцахаа больсон. Бид бие биенээ хүндэлдэг. Хамтдаа байхыг хүсдэг, сайхан байдаг тул бид нэг нэгнээ дахиж алдахыг хүсэхгүй” гэж Рианна нэмж өгүүлсэн байна.
Р.Гэгээ
