Эх орондоо төдийгүй дэлхийн хөгжмийн ертөнцөд олон мянган шүтэн бишрэгчтэй, Өмнөд Солонгосын охидын номер нэг хамтлаг “Wonder Girls” түр хугацаанд уран бүтээлээ орхихоор болсон тухайгаа мэдэгджээ. Дээрх шийдвэр нь хамтлагийн уран бүтээлчид хувийн амьдрал, соло карьер гээд тус тусынхаа зам мөрийг хөөхөөр болсонтой холбоотой гэнэ. Тодруулбал, өнгөрөгч нэгдүгээр сарын 26-нд хуримаа хийсэн хамтлагийн гишүүн Sun ирэх гуравдугаар сард Малдивт бал сараа өнгөрүүлсний дараа нөхрийнхөө хамт Канадад амьдрах гэж байгаа аж. Хамтлагийн бусад гишүүдийн хувьд өөр өөрсдийн төлөвлөсөн ажил байгаа хэмээн “JYP Entertainment” мэдээлжээ. Тухайлбал, хамтлагийн гишүүн Yeeun хөгжмийн сургуульд орсон бол Yubin шинэ кинонд тоглохоор төлөвлөж байгаа гэнэ. Sohee-ийн хувьд мөн телевизийн олон ангит кинонд тоглохоор цаг зав багатай байгаа бол хамтлагийн гишүүн Lim хөгжмийн чиглэлээр суралцах гэнэ.
Хөгжмийн ертөнцөд өөрсдийн дуу хоолойгоороо өвөрмөц стиль имиж бүрдүүлсэн “Wonder Girls” хамтлагаараа хийх уран бүтээлээ түр хойш тавьж байгаа ч уран бүтээлдээ эргэн ороход хэзээд нээлттэй байх болно гэдгээ фенүүддээ дуулгажээ.