Берлинд жил бүр уламжлал болон зохиогддог олон улсын кино наадам 2013 оны 2 сарын 7-нд эхэлсэн. Берлины 63 дахь удаагийн кино наадам Хятадын найруулагч Вонг Кар Вайн бүтээл “Их мастер” киногоор эхэлжээ. Гэхдээ энэ кино наадамд өрсөлдөөгүй байна. Нийтдээ Берлины кино наадамд 19 кино өрсөлдөж байгаа аж. Вонг Кар Вай Берлины кино наадмын ерөнхий шүүгчээр ажиллаж байгаа юм байна. Түүний “Их мастер” кино нь Ип Мане болон Брюс Лигийн тулааны урлагийн талаар өгүүлдэг. Киноны үйл явдал Хятадад 1930-аад оны үед өрнөнө. Дайн дажин, хайр дурлал, өшөө хорсол, энэ бүхнийг Хятадын нэрт найруулагч өөрийн “Их мастер” киногоороо харуулахыг зорьжээ. Вонг Кар Вай өөрийн энэ бүтээлээ мөрөөдлийн төсөл гэж нэрлэжээ. Наадмын үндсэн хөтөлбөрт 19 зураг орж байгаагийн тавыг нь уралдаанаас гадуур үзүүлэх юм байна. Шилдэг киноны “Алтан баавгай” шагналын төлөө Ираны найруулагч Жафар Панахийн “Хаалттай хөшиг”, Германы Томас Арсланы “Алт”, Боснийн Данис Тановичийн “Төмөр хулгайчийн амьдралын нэг төрх”, Америкийн Стивен Содерберг болон Гаса Ван Сентийн бүтээлүүд өрсөлдөнө. Хоёрдугаар сарын 16-нд шүүгчид дүнгээ гаргаж “Алтан баавгай” шагналын эзнийг тодруулах юм. Берлины кино наадам 2 сарын 17-г хүртэл үргэлжлэх юм байна.
www.URLAG.mn
