Нью-Йоркийн загварын долоо хоногт анх удаа Монгол дизайнер уран бүтээлээ танилцууллаа. Тэр бол “Katya.Zol” брэндийг үүсгэн байгуулагч дизайнер Г.Золцэцэг.
Тэрбээр стилист Д.Энхмаа, нүүр хувиргагч Э.Эрдэнэсувд, загвар өмсөгч А.Сарнай болон бусад уран бүтээлчдийн бүрэлдэхүүнтэй энэ сарын 15-ны өдөр Нью-Йорк хотын загварын дүүрэгт орших "Нью-Йорк" зочид буудалд болсон "Couture Fashion Week"-т өөрийн бүтээлээ танилцуулсан бөгөөд түүний загварыг гадныхан өндрөөр үнэлсэн билээ.“Katya.Zol” брэнд нь Монголын загварын чиг хандлагыг дэлхийн тавцанд таниулж, дэлхийн түвшинтэй мөр зэрэгцэн яваа гэдгийг харуулах зорилготой байсан бөгөөд Монгол төрхийг илтгэсэн эрхэмсэг, хээнцэр загваруудаа нарийн ур хийц бүхий чимэг зүүлттэй хослуулан танилцуулжээ.Түүний талаар www.couturefashionweek.com сайтад “ “Katya.Zol” брэнд нь Монголын орчин үеийн залуу зохион бүтээгчдийн шинэ үеийн илэрхийлэл. Загвар зохион бүтээгч Г.Золцэцэгийн бүтээлүүд нь урт удаан хугацаанд оршин тогтнох загварын чиг хандлагыг бий болгогч шинэ залуу үеийнхэнд зориулан хийгдсэн юм. Түүний загварууд өвөрмөц онцгой хэв маягтайгаас гадна урт удаан оршин тогтнох чадвартай. Саяхан Katya.Zol Азийн бар улсуудын нэг Малайзын нэгэн загварын арга хэмжээнд өөрийн коллекцоо танилцуулсан. Түүний загварууд мөн “Cosmopolitan” сэтгүүлд нийтлэгдсэн байна” гэжээ.Дизайнер Г.Золцэцэг өрийн "Фэйсбүүк" хуудаснаа "үнэхээр том ажлын ард гарлаа" гээд хамтран ажилласан баг бүрэлдэхүүндээ баярлаж, талархсанаа илэрхийлсэн юм.
Б.Соёлмаа
