АНУ-ын Лос-Анжелес хотын “Dolby” театрт ирэх ням гаригт болох кино урлагийн хамгийн нэр хүндтэй наадам “Academy Awards”-т Женнифер Хадсон, Рассел Кроу, Кетрин Зета-Жонс зэрэг Оскарын шагналтнууд оролцох гэнэ. Дэлхийд алдартай кино одод Кино академийн тэргүүн дээд шагнал гардуулах ёслолын тайзнаа зарим номинацийн ялагчдыг тодруулах хүндтэй үүрэг хүлээжээ. Харин ёслолын ажиллагааг жүжигчин, найруулагч, кино зохиолч Сет Макфарлейн хөтлөн явуулах юм.
Энэ жилийн хувьд тус кино наадамд найруулагч Том Хуперийн “Les Miserables" “шилдэг мюзикл кино” номинацид нэр дэвшээд байна. Түүнчлэн Les Miserables"-ийн гол дүрийн жүжигчин Хью Жекман шилдэг эрэгтэй жүжигчний шагналд нэр дэвшээд байгаа бол тус кинонд тоглосон нэрт жүжигчин Энн Хэтэуэй мөн “шилдэг туслах дүр” номинацид өрсөлдөх юм.