Монголын нэрийг зөвхөн тамирчид л дэлхий дахинд дуурсгаж, алдар цолоо мандуулдаг гэсэн ойлголт аль хэдийнэ хоцрогджээ.Монголчууд салбар бүрт хүчээ сорьж, чаддаг бүхнээрээ эх орноо хилийн чанадад сурталчилж явна. Тэр дундаа “Монголын цирк мөхлөө” хэмээн олон хүн уулга алдан харуусаж байгаа энэ цаг үед манай циркчид дэлхийн өнцөг булан бүрт ажиллаж, сая, сая үзэгчийг алмайруулсаар байна.
Тухайлбал, монгол уран нугараач Д.Ундармаагийн нэгэн ховор зургийг АНУ-ын “Ringling Circus Museum”-д мөнхөлсөн байна. Энэхүү музей нь Sarasota Florida-д байрладаг бөгөөд дэлхийд алдартай “Ringling Bros and Barnum Bailey Circus”-ийн нэгэн салбар юм. Энэхүү музейн барилгыг John Ringling 1924-1926 онд эхнэр Mable Ringling-дээ зориулан бариулсан түүхтэй.
Анх 1992 онд улсын циркийн 20, Ардын дуу бүжгийн чуулгын 10 гаруй уран бүтээлчтэй баг АНУ-д гэрээгээр ажиллахаар эрх чөлөөний орныг зорьсон билээ. Тэр үед манай циркчид хоёр жилийн хугацаанд АНУ-ын 50 мужийн 90 хотод аялан тоглолт хийсэн. Түүнээс 18 жилийн дараа “Ringling bros and Barnum & Bailey” Монголоос дахин номер авах хүсэлт ирүүлсний дагуу Монголын үндэсний циркийн уран бүтээлчдийн баг Америкийг зорьсон юм.
Тэд ганцхан жилийн дотор Америкийн 42 хотод 420 гаруй тоглолт хийж, 30 гаруй сая хүнд монгол циркийн гайхамшгийг бишрүүлсэн. Тэгвэл уран нугараач Д.Ундармаа 1992 онд АНУ-д буусан Монгол циркчдийн десантын “цэрэг”-үүдийн нэг юм. МУГЖ, уран нугараач Л.Энхцэцэг, Д.Отгонцэцэг нарын нэр ч мөн дэлхийн шилдэг циркүүдийн нэг “Ringling Circus Museum”-д мөнхрөн үлджээ.
Отгоо Уоллер хэмээх нэрээр алдаршсан Д.Отгонцэцэг өдгөө ч АНУ-д мэргэжлээрээ амжилттай ажиллаж байгаа. Тэрбээр 2000 онд АНУ-ын Тайзны жүжигчдийн холбооны гишүүнээр элсэж, 20 гаруй нэр хүндтэй шоу, кино, зар сурталчилгаа, тоглолтод оролцжээ. Эдгээрийн дунд алдарт дуучин Бритни Спирсийн шоунд оролцсон нь анхаарал татав.
Түүнчлэн хичээл зааж, энэ чиглэлийн уралдаан, тэмцээнүүдэд шүүгчээр ажилладаг байна. Хамгийн сүүлд л гэхэд 2008 оны олимпод оролцсон АНУ-ын синхрон сэлэлтийн багт багшилж, дуулиан дэгдээж байсан. Монгол Улсын гавьяат жүжигчин Л.Энхцэцэг “Анжелс” төвийн уран нугаралтын багшаар ажиллаж буй. Энэхүү төв зундаа Турк, өвөл нь Герман, Швейцариар аялан тоглолт хийдэг аж.
Харин “Ringling Circus Museum”-д зургаа залсан, уран нугараач Д.Ундармаа өдгөө АНУ-д амьдарч байгаа. Тэрбээр Лос Анжелест байрладаг “RME Troupe” хэмээх театрчилсан урлагийн компанид ажилладаг юм байна.
Эх сурвалж: Өглөөний сонин
