АНУ-ын нэрт төгөлдөр хуурч Ван Клиберн 78 насандаа өвчний улмаас таалал төгсчээ. Дэлхийн сонгодог хөгжмийн урлагийн чадварлаг уран бүтээлчдийн нэг тэрээр ясны өмөн үү өвчний улмаас удаан хугацаанд шаналж, Техасын Форт Уэрт дахь гэртээ өчигдөр амьсгал хураасан хэмээн түүний дотны анд Мари Лоу Фалкон мэдэгдсэн байна. Тэрээр өнгөрсөн жилийн наймдугаар сараас хойш хорт хавдраар өвчилж, эмчилгээ хийлгэж байжээ.Клиберн дэлхийн урлаг тэр дундаа сонгодог хөгжмийн урлагт шавхагдашгүй авьяастан хэмээн хүлээн зөвшөөрөгддөг уран бүтээлч байсан төдийгүй хүйтэн дайны дараа 1958 онд Москва хотод П.И. Чайковскийн нэрэмжит шагнал хүртэж байсан нэрт хөгжимчдийн нэг аж. Ван Клиберн мөн 2010 онд Ерөнхийлөгч Барак Обамагаас Үндэсний соёл урлагийн хүндэт медаль гардаж байжээ.Клибернийг таалал төгссөний дараа алдарт төгөлдөр хуурч Стивен Хаф BBC-д өгсөн ярилцлагадаа “Тэр харамгүй авьяастан нэгэн атлаа даруу төлөв, өршөөнгүй нэгэн байсан. Бидний цаг үеийн, урлагийн нэгэн баатар байсан” гэжээ. Луйзианагийн Шривпортод 1934 онд төрсөн Клиберн гурван наснаасаа эхлэн ээжээрээ төгөлдөр хуур заалгаж, 17 настайдаа Нью-Йоркийн урлагийн томоохон сургуулиудын нэг “Juilliard”-д элсэн орж, урлагт хөл тавьжээ. Тэрээр мөн АНУ-ын 33 дахь Ерөнхийлөгч Харри Трумэн, 43 дахь Ерөнхийлөгч Жорж Уокер Буш нараас урлагийн хүндтэй шагналууд гардаж байсан ажээ.
Эх сурвалж: www.news.mn