Брэд Питт хүүхдүүдийнхээ төлөө юу ч харамладаггүй сайн эцэг. Тэрээр өөрийн, өргөж авсан гээд зургаан хүүхэдтэй ч тэднийг алаг үздэггүйн дээр үргэлж хүсэл сонирхлыг нь дагаж, хөгжүүлэхийг хичээдэг ажээ. Тэрээр Анжелина Жолигийн хамт Францын зүүн өмнөд нутагт орших Миравалийн эдлэндээ эхлээд дарсны талбай байгуулсан бол одоо дэргэд нь амьтдын хүрээлэн байгаа юм байна. Одоо ч Брэдийн цуглуулсан амьтдаар бүрэн амьтдын хүрээлэн нээчихэж болохоор байгаа аж. Хүүхдүүд нь, ялангуяа хөвгүүд нь Брэдээс арслан, бар, матар зэрэг хүчирхэг араатнуудыг авчрахыг хүссэн ч ухаантай эцгийн ёсоор тэмээн хяруул, галуу, туулай, ямаа, нугас зэргийг эхний ээлжинд авчирчээ.
“Брэд хүүхдүүддээ зориулан амьтдын хүрээлэн байгуулахыг хичээж байгаа. Хамгийн гол нь сургаж, хайрлаж болохоор амьтдыг л хүүхдүүддээ ойртуулахыг тэр хүссэн. Хүүхдүүдээ амьтныг хайрладаг хүн болгож өсгөх гэсэндээ л ингэж буй хэрэг” гэж ойрын гэх эх сурвалж ярьжээ.
