Монгол Улсын Боловсролын Их Сургуулийн Дүрслэх Урлаг Технологийн Сургуулийн багш, Монголын Урчуудын Эвлэлийн гишүүн, зураач Отгонбаатарын Доржготовын “Хөх тасархай” уран бүтээлийн бие даасан үзэсгэлэн 2013 оны 3-р сарын 22-ноос 28-ны хооронд Монголын Урчуудын Эвлэлийн “Арт галерей”-д зохион байгуулагдах гэж байна. Зураач 2002 онд Дүрслэх Урлагийн Дээд Сургуулийн Монгол зургийн ангийг төгссөн бөгөөд энэ удаагийн үзэсгэлэн түүний 3 дахь бие даасан үзэсгэлэн юм. Тэрээр эх орондоо төдийгүй Япон, БНХАУ, АНУ, Финлянд зэрэг улсуудад бие даасан болон хамтарсан үзэсгэлэнгүүдэд оролцож байжээ. Энэхүү үзэсгэлэнд түүний Монгол зургийн уламжлалт арга барилаар зурсан бүтээлүүд болон өнгө, зохиомжийн шинэлэг шийдлээр бүтээсэн 26-н бүтээл тавигдах ажээ.
Тэрээр өөрийн үзэсгэлэнгээ нэрлэсэн “Хөх тасархай” хэмээх бүтээлээ тайлбарлахдаа:
“Овоо бол Монгол хүмүүний оюун санаа, танин мэдэхүй, ухаарлын оролцоотойгоор бүтсэн хамгийн эртний туурвилуудын нэг юм. Монголчууд өн эртнээс нааш мөнх тэнгэрийг шүтэж, байгаль дэлхийгээ дээдлэж, хайрлан хамгаалж ирсний илэрхийлэл нь овоо юм.
Энэхүү бүтээлээрээ өвөг дээдсээс заяаж үлдээсэн ариун дагшин эх нутгаа хайрлан хамгаалж, оюуны болон байгалийн хэмжээлшгүй их баялагаа ухаалгаар хүртэн амьдрахыг даяарчлалын эрин зуунд хүн төрөлхтөнтэй хөл нийлүүлэн алхаж буй элэг нэгт Монголчууддаа уриалсан болно. Өндөр уулын орой дээрхи эрдэнийн чулуугаар босгосон овооны гол модноос таван өнгийн хадаг яндир салхины аясаар өнгө сүлэлдэн хийсэх агаад зуун зууны түүхийг хүүрнэх овооны оройд хадаганд нандигнан ороож өргөсөн мөнгөн аяга цухуйна. Энэ нь зохиомжийн гол төвийг хураан зангидах агаад хүмүүний оюуны ур, байгалийн баялаг, тансагийн яруу тодыг илтгэнэ.
Овооны хадаг Монголын хөх тасархай…” хэмээжээ.
www.URLAG.mn
